Taldyqorǵan qalasynda "Analarǵa taǵzym" eskertkishi salynýy múmkin. Mundaı ıdeıany oblys ákimine "Egemen Qazaqstan" gazetinde talaı jyl eńbek etken  zeınetker jýrnalıs Kúmisjan Baıjan usyndy.

Óńir basshysy Amandyq Batalov Jetisý jeriniń názik jandaryn halyqaralyq áıelder kúnimen quttyqtady. Amandyq Batalov óz sózinde atap ótkendeı, qazir Almaty oblysyndaǵy bıznes sýbektileriniń 40 paıyzǵa jýyǵyn qyz-kelinshekter basqaryp, joǵary kórsetkishke qol jetkizýde. Saltanatty jıyn barysynda qurmetke bólengen analar men názik jandylar rızashylyǵyn bildirip, óz usynystaryn da jetkizdi. Zeınetker jýrnalıs Kúmisjan Baıjan oblysqa analarǵa taǵzym etetin eskertkish qajet ekenin aıtty.

Oblys ákimi Amandyq Batalov bul bastamany qyzý qoldaıtynyn aıtty. Sebebi Jetisý jerindegi qyz-kelinshekter aımaqtyń damýyna ólsheýsiz úles qosyp keledi. Memlekettik qyzmetkerlerdiń teń jartysyna jýyǵy názik jandylar. Barlyq deńgeıdegi máslıhat depýtattarynyń 70 paıyzy áıel-analardan quralǵan. Almaty oblysynda 80 «Altyn alqa» ıegeri jáne  265 «Kúmis alqa» ıegeri bar. Qazir olardyń qatary taǵy tolyǵa túsken.    

"Óte jaqsy ıdeıa. Men qoldaımyn. Bolashaqta  "Analarǵa taǵzym" eskertkishi Taldyqorǵannan boı kóterse  qandaı keremet", - dedi A. Batalov.

Záýre Shonbaeva, «Altyn alqa» ıegeri:

– Segiz balam bar. Úsh qyzym, bes ulym. Eki ulym Máskeýge baryp keldi. Qazir ákesine kómektesip jatyr. Bári ıbaly, tárbıeli. Qazaqstannyń bolashaǵy, altyn ýyqtaı azamattary bolady dep senemin.

Jansaıa Musylmanbekova, «Kúmis alqa» ıegeri:

– Jasym 33-te, 6 balanyń anasymyn. 4 qyz, 2 ul tárbıelep jatyrmyz. Joldasym ekeýmiz josparlaǵan joqpyz. Bizge Allanyń bergeni ǵoı, soǵan táýba dep júrmiz. Armanym 4 qyzymdy, 2 ulymdy Qazaqstannyń bir úlgili azamaty qylyp tárbıelegim keledi. Meniń bar armanym sol.