EKSPO týrısik aýmaǵynda Naýryz meıramy alǵash ret toılandy. Ulystyń uly kúnin toılaý aıasynda «Nur Álem» - «Bolashaq energıasy» murajaıynyń irgesinde kıiz úıler tigilip, shatyrlar ornatylyp, ulttyq dástúrimiz ben ádet-ǵuryptardy baıandaıtyn teatrlandyrylǵan qoıylymdar ótkizilip, sporttyq oıyndar oınatylyp, qazaq mádenıeti murajaılarynda dástúrli qolóner týyndylary usynylǵan. Áıgili sheberler zergerlik, keste tigý óneri, aǵashty oıý, temirdi kórkemdep óńdeý, dástúrli toqymashylyq, qamshy órý jáne t.b. qolóner buıymdaryn usyndy.

Merekelik is-sharaǵa shyǵarmashylyq ujymdar, bı toptary men belgili oryndaýshylar jumyldyrylǵan. Qonaqtar ystyq baýyrsaq pen naýryz kójeden dám tatty.

Naýryz meıramy erteń, 22 naýryz kúni saǵat 10.00-de jalǵasyn tappaq. EKSPO týrısik aımaǵynyń nysandary bolsa, qarańǵy túskenshe jumys isteıdi. Meıramǵa kelgen qonaqtar «Nur Álem» - «Bolashaq energıasy» murajaıy men Úzdik tájirıbeler aımaǵyn saǵat 21.00-ge, EKSPO muz aıdynyn 23.00-ge deıin tamashalaı alady.

Budan bólek, EKSPO-2017 aýmaǵynda kelýshilerdiń jaılylyǵy úshin 1000 avtooryndyq jerasty turaǵy qarastyrylǵan. Turaq táýlik boıy jumys isteıdi, oǵan kirý/shyǵý T. Rysqulov kóshesi jaǵynan (ońtústik kirý toby) júzege asyrylady.

Kórme aıaqtalǵannan keıin týrısik aımaqtaǵy EKSPO-2017 murasynyń eń mańyzdy nysany, sózsiz, «Nur Álem» pavılon-murajaıy bolyp tabylady. Ol 2017 jylǵy qarashada erekshe qorǵalatyn memlekettik sáýlet nysany bolyp tanyldy.

Sondaı-aq, «Nur Álem» sheteldik BAQ-ta elordamyzdyń jańa sımvoly Astananyń eń jıi eskeriletin týrısik nysany qatarynda.

Úzdik tájirıbeler aımaǵy – EKSPO-2017 sımvolıkalyq ortalyǵy. Onda eń úzdik tehnologıalar, jobalar men ártúrli energetıka salasyndaǵy strategıalar usynylǵan. Onda ónerkásipte, elektrqýatyn saqtaý men qoldaný, klımattyń ózgerýimen kúres nemese damýshy elderde elektrenergıasymen qamtamasyz etý joldary qarastyrylǵan.

Kórme kesheniniń mańynda Kongres-ortalyǵy ornalasqan. Kongres-ortalyǵynda aýqymdy mádenı oıyn-saýyq sharalar, taqyryptyq forýmdar men konsertter ótkizýge barlyq múmkindikter qarastyrylǵan.

Energıa holy - kameralyq konsertter, óner toptarynyń qoıylymdary  úshin joǵarytehnologıalyq dybystyq qurylǵylarymen jabdyqtalǵan, kópfýnksıaly sahna alańy.