22 naýryz – Ulystyń Uly kúni!  Kún men túnniń teńelip, Samarqannyń kók tasy erip, jer jahanǵa jylýlyq tarap, kóktem kelgenin habarlap turatyn meıramdy Almaty qalasynyń turǵyndary joǵary deńgeıde atap ótip jatyr.

Astana alańyna 6 kıiz úı tigilip, 14 ınstallásıa ornatyldy. Balalar jáne sport oryndary, Orta Azıanyń qoldanbaly óner sheberleriniń sheberlik synyptary úshin 17 aımaq, saýda shatyrlary, fýdkorttar, 1200 oryndy kórermender trıbýnasy uıymdastyryldy.

Úlken merekelik konsertte «Mýzart», «Dosmuqasan» toby , Roza Rymbaeva jáne ózge de 500-den astam óner adamdary  óner kórsetti.

Alańda ulttyq qolónerdi dáripteıtin kórmeler uıymdastyrylǵan. Tekemet, syrmaq, kıizden jasalǵan tósenishter oıýmen kómkerilip, dástúrimizdi jańǵyrtyp tur. 

Sonymen qatar on saýsaǵynan  óner tamǵan sheberler ulttyq buıymdardy kópshilik aldynda  jasap, bilezik, syrǵa, saqına jasaýdyń syrlarymen bólisýde.

Kórmege qoldan oıyp jasalǵan túrli músinsheler qoıylǵan.  Shańyraq, dombyra, qobyz sekildi ulttyq qundylyǵymyzdy dáripteıtin músinshilerge halyqtyń qyzyǵýshylyǵy da joǵary. 

Al Naýryz meıramynyń bıylǵy logotıpine keler bolsaq, «Naýryz 2018» sózi qabyldanǵan latyn qarpimen jazylǵan.

Mereke Panfılov jáne Jibek Joly kóshelerinde de ótip jatyr. Bul mańda quraq kórpe tigilip, kıiz basýdyń joldary da úıretilip jatyr. Qoldan jasalǵan tymaq, sáýkele sekildi baskıimder men shapan, oıaly kóılekter satylymǵa shyqqan. 

Sonymen qatar kitaptar kórmesi uıymdastyrylyp, jastar arasynda sporttyq baıqaýlar ótýde. 

Al alań mańyndaǵy jármeńkeden ulttyq naqyshtaǵy oramaldar men sómkeler, áshekeı buıym men turmystyq qoldanystaǵy zattardy taba alasyz. 

Klasıka súıer qaýymǵa da jaǵdaı jasalǵan. Jandy daýysta mýzykalyq aspaptardyń súıemeldeýimen shaǵyn konsertter uıymdastyrylǵan.

Eske sala ketsek, Almaty qalasy ákimdigi bıyl Naýryz meıramy bir aı boıy toılanatynyn habarlady. 

24 naýryzda Jibek Joly kóshesi boıyndaǵy sahnada «Naýryz-Dýman» ótedi, munda saǵat 11:00 den 17:00-ge deıin QR Sýretshiler Odaǵy sheberleri men jas sýretshilerdiń birikken pleneri uıymdastyrylady, saǵat 19:00-21:00 aralyǵynda – «Open air cinema» ótedi, ıaǵnı Sh. Aımanovtyń retrospektıvti kınolary men Qazaqstannyń materıaldy emes mádenı murasy bolyp tabylatyn «Qyz Jıbek», «Orteke», «Kıiz basý», «Qorqyt Ata murasy: Epıkalyq mádenıet jáne mýzyka», «Qazaqtyń zergerlik buıymdary», «Keste», «Asyq atý» jáne basqa fılmder kórsetiledi.

25 naýryzda saǵat 11:00-13:00 aralyǵynda alańda býkkrossıng — mádenı mura men kitap kórmesi uıymdastyrylady. Saǵat 14:00-17:00 aralyǵynda- «Kitap Fest», saǵat 19:00-21:00 aralyǵynda – «Open air cinema» ótedi, bularda «Keramıka óneri» (Ózbekstan), «Jibek toqý» (Ózbekstan), «Aspaly arqanmen júrý» (Ózbekstan), «Kók bóri» (Qryǵyzstan), «Salt- dástúr ánderi» (Qyrǵyzstan), «Monǵoldyń dástúrli ústel oıyndary» (Monǵolıa), «Morınhýr — monǵoldyń qyl perneli aspaby» (Monǵolıa), «Salt- dástúr ánderi» (Tájikstan) jáne basqalary uıymdastyrylady.