Qoǵam qaıratkeri Arýjan Saın óziniń Facebook paraqshasynda Abaı aýylynyń 7 jastaǵy turǵynyna qatysty aqparat jarıalady, dep habarlaıdy Qamshy.kz aqparat agenttigi. 

«OQO Abaı aýylyndaǵy 7 jastaǵy balaǵa qatysty jańa derekter:

1 Bala men onyń anasy búginde Almaty qalasynda, memlekettiń qamqorlyǵynda ári qaýipsiz jerde otyr. Olardy Almaty qalalyq polısıa qyzmetkerleri óz baqylaýyna alǵan.

2 Jaqyn arada QR Bas prokýratýrasy tergeý jumystaryn bastaýdy kózdep otyr, Baýyrjan Azanov esimdi advokat tergeý organdary qyzmetkerlerimen birge daıyndyq jumystaryn júrgizýde.

3 Jasóspirimder men eresekterge zorlyq kórsetý baby boıynsha qylmystyq is qozǵalyp jatqandyqtan, barlyq sot otyrystary jabyq túrde bolady jáne tergeý nátıjelerine qatysty qandaı da bir aqparatty QR Bas Prokýratýrasy ǵana málimdeı alady.

4 Sonymen qatar saraptama nátıjelerine qatysty shyn ári obektıvti medısınalyq saraptama jasaý úshin shetel sarapshylarymen kelisim júrgizilýde. Sarapshylardyń tizimin balanyń advokaty kelesi aptanyń basynda aıtatyn bolady.

5 Balanyń anasy Astanada sýyq tıip, syrqattanyp qalǵan eken. Qazir ol ózin jaqsy sezinedi.

6 Zorlyq kórgen balanyń otbasyn qoldap, kómek kórsetken jáne otbasy men advokattyń barlyq shyǵynyn ótegen azamattarǵa alǵysymyz sheksiz. Sonymen qatar, Aıdyn  men Anar Rahymbaeva, Dana Altynbekova, Sanjar Boqaev, Erkin men Ásel Tátisheva, Músir Qurmanǵazy esimdi azamattarǵa jáne basqa da kómek kórsetken adamdarǵa kóp raqmet.

Ótte mańyzdy! Zańgerdiń kómegi nemese basqa da shyǵyndar eshkim arnaıy qarjy jınaýmen aınalysyp júrgen joq. Eger kim de kim kómek qolyn sozamyn dese, Tatána Semenova, Adel Samıt jáne Janna Ahmetova degen kisilerge habarlasýyna bolady.

Sotqa deıingi tergeý amaldary uzaq ýaqyt alatynyn bilemiz, biz sabyr saqtap kútýimiz qajet. Eń bastysy, bári ádil jolmen sheshilse boldy.

Barlyǵyńyzǵa alǵys bildiremin!» - dep jazady Arýjan Saın.