Aqjaıyq aýdanynyń Bogatsk kentine jaqyn mańda eki kólik soqtyǵysty. Saldarynan bir adam kóz jumyp, toǵyzy zardap shekti, dep habarlaıdy Moı gorod.

Jol apaty keshe  saǵat 16:30 shamasynda Oral-Atyraý tas jolynda boldy. Kýágerlerdiń aıtýynsha, Nexia men VAZ-21099 kólikteri soqtyǵysqan. 

BQO densaýlyq saqtaý basqarmasy basshysynyń orynbasary Nurdanat Berkinǵalı jol apatynan 9 adam zardap shekkenin, bir áıel jedel járdem kelgenshe kóz jumǵanyn málimdedi. 

— 47 jastaǵy er adam oblystyq klınıkalyq aýrýhanaǵa jetkizildi. Taǵy ekeýi Aqjaıyq aýdandyq aýrýhanasyna júgindi, — dedi Berkinǵalı. 

Aıta ketsek, keshe shuǵyl qyzmet aýa raıynyń qolaısyzdyǵyna baılanysty dabyldy eskertý jarıalaǵan bolatyn. Kóktaıǵaqqa baılanysty barlyq baǵyt boıynsha tas joldar jabyldy.