Taldyqorǵanda «Taǵzym» atty ádebı-mýzykalyq kesh ótti. Tórtinshi ret uıymdastyrylyp otyrǵan rýhanı shara ádebıet aıdynda qalam terbegen aqyn jazýshylar men jýrnalıser ómiri men shyǵarmashylyǵyna arnaldy.

Taldyqorǵan qalasyndaǵy İ. Jansúgirov atyndaǵy Mádenıet saraıyna Jetisýdyń segiz birdeı óner tarlanyn eske alýǵa arnalǵan ádebı sazdy kesh ótti. Kesh júrgizýshisi beligili aqyn Jumataı Ospanuly. Osymen  tórtinshi ret uıymdastyrylyp otyrǵan «Taǵzym» atty sharaǵa Almaty oblysy ákimdigi jan-jaqty qoldaý kórsetip, oblystyq tilderdi damytý basqarmasy uıtqy bolǵan.   Mundaǵy  maqsaty   – óńirdegi ult mádenıetiniń órkendeýine eleýli úles qosyp kelken óner maıtalmandarynyń eńbegin  keńinen dáripteý  arqyly  jastarǵa úlgi ónege syılaý.

Keshte aqyn Temirǵalı Rústembekov, Qudash Muqashev, ádebıet pen jýrnalısıkany qatar alyp júrgen Baqyt Álimov, Rafat Ábdiǵulovtardyń ómirinen syr shertilip, óleńderi men shyǵarmalary oqyldy. Al telejýrnalıstıkada ter tókken Edil Tókenov, Tursynbek Aıtbek, Natalá Borsenko týraly beınefılmder kórsetilip, olardyń efırge daıyndaǵan materıaldary jurt nazaryna usynyldy. Sondaı-aq teatr aktery Asan Isaevtyń sahnadaǵy ómirine arnalǵan derekti týyndy da kesh qatysýshylarynyń kóńilin tebirentti.

Ádebı keshte eske alynǵan árbir tulǵanyń beınesi qylqalammen qaǵazǵa túsirilip, týystaryna tabystaldy. Almaty oblystyq tilderdi damytý basqarmasynyń taǵlymy mol sharany uıymdastyrýdaǵy basty maqsaty óner oǵlandaryn eske alý arqyly jastar jadysynda jańǵyrtý.

Kesh shymyldyǵy  ot aýyzdy, oraq tildi zaǵıyp aqyn Temirǵalı Rústembekovtiń 14 jasynda áke-sheshesin saǵyna jazǵan jyr shýmaqtarymen túrildi. Osydan soń aqynnyń ómiri jaıly  «Jetisý» telearnasy arnaıy  daıyndaǵan beınebaıan jurt nazaryna usynylyp, qyzy Kúnsaıa Ospanova ákesi týraly estelikterimen bólisti. Kelesi kezekte jurt lırık aqyn, birneshe dramalyq  shyǵarmalar men dastandardyń avtory  Qudash Muqashevti eske aldy.  Qysqa ǵana qyryq bir jyldyq ǵumyrynda  artyna óshpes iz qaldyryp ketken  Qudash aqyn men onyń jary Aqjoltaıdyń jastyq shaǵy sheber somdalǵan sahnalyq qoıylymda kórinis tapty. Dál osylaı bastalǵan taǵylymdy shara áýezdi án, tolǵamdy jyr joldarymen jalǵasyp, qazaq jýrnalısıkasynyń qos tarlany  Baqyt Álimov, Rafat Ábdiǵulovqa, «Jetisý» telearnasyna eleýli eńbek sińirgen Edil Tókenov, Natalá Borsenko, Tursynbek Ybyraıymbekulyna jáne sahnalyq tekti ónerdiń  teńdesiz sheberi  Asan Isaevqa arnaldy.  Jınalǵan jurt aldynda sóz alǵan  Almaty oblysynyń tilderdi damytý jónindegi basqarmasynyń basshysy Aıdar Bashbaev : «Ultymyzdyń rýhanı, mádenı murasy – sóz óneriniń asyl qazynasyna ólsheýsiz úles qosqan Jetisý ólkesiniń mádenıet jáne ádebıet salasynyń qaıratkerlerine qurmet kórsetý – bizdiń basty paryzymyz. Osydan tórt jyl buryn aqyn Ahmetbek Kendirbekulynyń bastamasymen qolǵa alynǵan «Taǵzym» sharasy jyl saıyn  jalǵasyp, dástúrge aınaldy. «Jaqsynyń jaqsylyǵyn aıt, nury tasysyn» demekshi, joba avtoryna aıtar alǵysymyz sheksiz. Bul is budan bylaı da jalǵasa bermek. Máńgilikke baǵyt alǵan qazaq eli barda arystaı azamattardyń esimi el esinen esh óshpeıtin  bolady» – dedi.

 Shara barysynda  kesh keıipkerleriniń qylqalam sheberleri salǵan  sýretteri týǵan-týys, et jaqyndaryna  tabys  etildi.