Almaty oblysynyń ákimi Amandyq Batalov sý basqan aýyldarǵa ózi bardy. Óńir basshysy úsh aýdanda bolyp, ondaǵy ahýalmen tanysty.
Almaty oblysy Tuzdybastaý aýylynda sý basqan aýmaqtardy tazartý jumystary áli de jalǵasyp jatyr. Munda qardyń qarqyndy erýi nátıjesinde 27 aýla sý astynda qalǵan. Oblys ákimi jumys barysynda sý basqan aýlalardy tazartý úshin qural – jabdyqtar men adam kúshteriniń sanyn kóbeıtýdi tapsyrdy. Belsendi jumystyń nátıjesinde búgingi kúni 3000 tekshe metr sý soryldy.
«Qazirgi ýaqytta osy eldi mekendegi máseleler sheshimin tapty, biraq bul jumys aıaqtalmaıdy. Sý tasqynynyń aldyn alý úshin sarapshylar áli de jumys isteý ústinde. Sý astynda qalǵan aýyl turǵyndarynyń jaǵdaıyn aımaqtyq komısıa jiti baqylaýǵa alyp, sonymen qatar materıaldyq kómek kórsetiledi. Aımaqta 144 sý qoımasy bar, olar boıynsha da jeke jumystar júrgizilip jatyr», – deıdi oblys ákimi Amandyq Batalov.
Aıta keteıik, aýyl kósheleri men aýlalarda jınalǵan sýdy tazartý úshin úshin jergilikti atqarýshy organdardan shamamen 326 adam, oblystyń tótenshe jaǵdaılar departamentinen 177 qyzmetker, 132 birlik tehnıka men 22 motor sorǵysyn qoldandy.
Talǵar aýdanyndaǵy Tuzdybastaý aýylynda erigen qar sýynan birqatar úılerdiń aýlasyna sý kirgen. Jaǵdaıdy saraptaǵan ákim jumys istep jatqan tehnıka sanyn kóbeıtýdi tapsyrdy. Kerek bolsa órt sóndirý kólikterin de sý sorýǵa jumyldyrý qajettigin aıtty.
Oblys ákimi Qarasaı aýdanyna qarasty Qyrǵaýyldy jáne Abaı aýyldaryna da baryp qaıtty. Qazir erigen qar sýynan arylýǵa 3 ekskavator, júk kóligi jáne 25 adam jumys istep jatyr. Aryqtardyń arnalary tereńdetilip, jaǵasy qum salynǵan qaptarmen bógetter turǵyzylýda. Qutqarýshylar zardap shekkenderdiń barlyǵyna kómek kórsetýde.
Amandyq Batalov Qarasaı aýdanyndaǵy Qaskeleń qalasyna baryp, mán-jaıdy bilip qaıtty.
Aýdan ortalyǵy Qaskeleń qalasynda oblys ákimine aýdan ákiminiń orynbasary, tótenshe jaǵdaılar boıynsha aýdandyq komısıa tóraǵasy Nurjan Satýbekov esep berdi.
«Sońǵy kúnderi erigen qar sýynan jaǵdaı edáýir kólemde ulǵaıyp jatyr. Qala kósheleri men aýlalaryna jınalǵan sýdan tazartý jumystaryna 100-ge jýyq adam jumyldyryldy. Shamalǵan aýylyn da sý basqan. Ol aýylda da jumys kúsheıtildi. 10-shaqty tehnıka jiberildi. Qyzyl sý aýyl mańyndaǵy alqaptarda 80 adam toqtaýsyz jumys istep jatyr», – dedi aýdandyq ákimniń orynbasary tótenshe jaǵdaılar jónindegi aýdandyq komısıanyń tóraǵasy Nurjan Sátýbekov.
Keshe keshke qaraı Jambyl aýdany tótenshe jaǵdaı jarıalaǵan bolatyn. Óńir basshysy ózgelerden kóbirek zardap shekken Qaınazar aýylynda da boldy. Qutqarýshylar men ulttyq gvardıa jaýyngerleriniń jyldam qımyldaǵanynyń arqasynda sý aýyldan tys baǵytqa buryldy. Amandyq Batalov sý kirgen birneshe úıde bolyp turǵyndarmen kezdesti. Áńgime barysynda bul baspanalar eshqandaı ruqsatsyz salynǵany anyqtaldy. Eki úıdiń de qujattary tolyq bolmaı shyqty. Birinde jalǵyz basty ana, ekinshisinde sozylmaly aýrýmen aýyratyn naýqas turyp jatyr. Eki otbasynyń aýyr jaǵdaıy eskerilip, oblys ákimi aýdan basshylaryna zardap shekkenderge barlyq qajetti kómek kórsetýdi tapsyrdy.
Arnaıy qurylǵan komısıa úı-úıdi aralap, qyzyl sýdan zardap shekkenderdiń tizimi jasalatyn boldy. Óńir basshysy sapardy qortyndylaı kele jaǵdaı tolyq saralanyp, akt jasalǵannan keıin qajetti kómek kórsetiletinin tilge tıek etti.
