Sol bir náýbet jyldary qanshama ultty jyly qabyldap, ósip órkendeýine múmkindik jasaǵan qazaq eline alǵysym sheksiz. Búgin Almaty oblysyndaǵy Bastóbe aýylynda «Alǵys aıtý» kúnine oraı ótken sharaǵa arnaıy kelgen Asyly Osman jınalǵan jurtshylyqqa osyndaı jyly lebizin bildirdi.

"Elbasymyz Nursultan Nazarbaevtyń 1 naýryzdy «Alǵys aıtý» kúni dep jarıalaýy kóregen kósemdikpen, ómirlik tájirıbemen jasalǵan zańdy sheshim. Óıtkeni búginde elimizde qanshama ult pen ulys tatý-tátti, baqýatty ómir súrip jatyr. Qanshama dinı senimniń adamdary bir-birimen túsinistikte, yntymaq-ymyrada turyp jatyr. Osynyń barlyǵy qazaq halqynyń keńpeıil meıirbandyǵynyń jáne qıyn-qystaý zamanda osynaý kıeli jerge eriksiz taban tirep, erkin ósip-óngen barlyq etnostardyń rıasyz rızashylyǵynyń arqasynda dep bilemin!" - deıdi Asyly Osman.

Alǵys aıtý kúni Almaty oblysy, Qaratal aýdanynyń Bastóbe aýylyndaǵy «Qazaq halqyna myń alǵys» atty eskertkish mańynda ótti. Igi sharaǵa jınalǵandar monýment basyna gúl shoqtaryn qoıyp, estelikterimen bólisti. Qazaqstan Halqy Assambleıasynyń múshesi, Almaty oblysynyń qurmetti azamaty Asyly Osman Alǵys aıtý kúniniń mán-maǵynasyn tereń uǵynyp, júrekpen seziný kerektigin aıtady. Qazaq tiliniń janashyry bul mereke ult pen ulysty, adam men adamdy jaqyndatyp, bir-birine degen meıirimin eseleıdi. Sol bir náýbet jyldary qanshama ultty jyly qabyldap, ósip órkendeýine múmkindik jasaǵan qazaq eline alǵysym sheksiz dep atap ótti.

«Alǵys sóziniń ózi ystyq yqylas, jyly júrekpen aıtylǵan izgi nıettegi sóz. Sondyqtan da men Otany bir azamattarymyzdyń barlyǵyn Alǵys aıtý kúnimen quttyqtaımyn. Osy dárejege jetkizgen qazaq halqyna alǵysym sheksiz!», - dedi Asyly Osman.

«Qazaq halqyna myń alǵys» memorıaldy keshenin 2012 jyly koreı ultynyń ókilderi ornatqan. Sebebi 1937 jyly totalıtarlyq júıeden japa shekken myńdaǵan koreıler dál osy jerge kóshirilgen bolatyn. Ash-jalańash, barar jer, basar taýy joq jurtty qazaq halqy baýyryna basty. Úıine kirgizip, bir japyraq nanymen bólisti. Aman qalyp, urpaq órbitýine sebepshi boldy. Osy jaqsylyqty umytpaǵan keıingi býyn áli kúnge deıin qazaq eline rızashylyǵyn bildirip keledi.