Byltyr Almaty oblysy ákiminiń 100 bilim granty bólinse, bıyl bul kórsetkish eki esege ósedi.

«Elbasynyń 5 áleýmettik basatamasynyń úshinshisi — Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý dep atalady. Osy rette, Prezıdent aldaǵy oqý jylyna taǵy 20 myń bilim grantyn bóletinin aıtty. Biz de óz tarapymyzdan Elbasy bastamasyna ún qosyp, oblys ákimi granttarynyń sanyn 100-ge arttyrmaqpyz. Osyǵan deıin 438 jetisýlyq stýdent oblys ákimi granty boıynsha bilim alsa, keler oqý jylynda olardyń sany 538 bolady». Bul týraly búgin oblys aktıviniń jıynynda Almaty oblysynyń ákimi Amandyq Batalov aıtty. Basqosý Elbasynyń 5 áleýmettik bastamasy aıasynda oblystyq atqarýshy bıliktiń jumysyn uıymdastyrý máselesine arnaldy.

Aktıv jıynyna oblysqa qaraıtyn aýdan-qalalar selektorlyq rejımde qatysty. 5 áleýmettik bastamanyń árqaısysyna jekeleı toqtalǵan A.Batalov atqarylýy kerek jumystardy pysyqtap, naqty tulǵalarǵa tapsyrmalar berdi.

 «Tıisti sala basshylary men orynbasarlaryma, sondaı-aq aýdan, qala ákimderine 12-naýryzǵa deıin Elbasy bastamalaryn júzege asyrý jónindegi jol kartasyn ázirleýdi tapsyramyn» degen óńir ákimi osy aptada 8-naýyrzdan basqa kúnderdiń barlyǵynda jumys isteý kerektigin atap ótti.

Oblystyq bilim basqarmasy basshysynyń orynbasary Maıgúl Omarovanyń aıtýynsha, tegin bilim grantyna oblystyń kez-kelgen túlegi úmitker bola alady.

«Eger túlek jınaǵan UBT degi balymen JOO-na túse almasa, bizdiń ákiminiń grantyna qatysýǵa múmkindigi bar. Arnaıy komısıaǵa qujattaryn ótkizedi. Biz  bıyl aýylsharýashylyq, tehnıkalyq jáne pedagogıkalyq mamandyqtarǵa basymdyq berip otyrmyz. Jáne otbasylyq jaǵdaıy tómen túlekterdiń jaǵdaıyna qarap, olardyń tegin bilim alýyna barynsha qoldaý kórsetemiz. Al túlekter ákimniń granty arqyly elimizdiń  kez-kelgen JOO-na túse alady», – dedi M.Omarova.

Jalpy bıyl Almaty oblysy boıynsha 16 myńnan astam oqýshy mektep bitiredi. Onyń 13 mynnan astamy qazirden UBT-ge qatysýǵa nıet bildirgen.

«Ótken jyly 8000-nan astam oqýshy JOO tússe, sonyń 3800 túlegi grant ıegeri bolǵan. Bıyl sol mejeden asamyz degen oıdamyz. Sebebi oblys ákimi tarapynan ótken jyly 100 bilim granty bólinse, bıyl  qosymsha taǵy 100 grant bólý josparlanǵan», – dedi M.Omarova.