Taldyqorǵan qalasynyń «Jastar» sport saraıynda dzúdodan jastar arasynda Qazaqstan Respýblıkasynyń chempıonaty bastaldy. Dúbirli dodaǵa elimizdiń ár óńirinen 400-den asa sportshy kelip, sheberlik baıqasýda.
Jarystyń saltanatty ashylý rásiminde Almaty oblysy ákiminiń orynbasary Jaqsylyq Omar alǵash sóz alyp, sportshylarǵa óziniń jyly lebizin bildirdi. – Qurmetti sport súıer qaýym! Oblys turǵyndarynyń jáne óńir basshysy Amandyq Batalovtyń atynan jarysqa kelgen barlyq sportshyǵarǵa Jetisý jerine qosh keldińizder degim keledi! Sizdermen búgin úlken jarysta bas qosyp otyrmyz. Kez-kelgen memleket óziniń aıbaryn, kúshin álemge pash etý úshin jáne ekonomıkalyq saıası jaǵdaıynyń turaqty ekenin baıqatý maqsatynda, eń áýeli osy sportqa úlken kóńil bóledi. Qazaqstanda da sportshylardyń deńgeıin kóterý baǵytynda kóptegen jumystar qolǵa alynyp, barlyq jaǵdaı jasalynyp jatyr. Qazirgi tańda elimizdiń jáne sonyń ishinde Almaty oblysynyń sportshylary álemdik arenalarda top jaryp, Alashtyń atyn shyǵaryp júrgendigi barshańyzǵa málim. Osyndaı úlken jankúıeri bar dzúdo kúresi tek Qazaqstanda ǵana emes, álemde de qanatyn keńge jaıyp otyr. Sondyqtan da sańlaqtarymyz baıraqty básekelerde elimizdiń dańqyn asyryp, kók týymyzdy bıikten jelbirete beretinine senimdimin. Al, búgingi dodaǵa túsetin sportshylarǵa tek qana sáttilik tileımin, — dedi J.Omar.
Sondaı-aq, óz kezeginde sóz alǵan Pekın Olımpıadasynyń kúmis júldegeri, QR-nyń dzúdo federasıasynyń vıse prezıdenti Asqat Jetkeev aıtýly jarystyń joǵary deńgeıde ótýine qoldaý kórsetken oblys ákimdigine rızashylyǵyn jetkizdi. Jarysta tek qana myqtylar jeńiske jetsin dep aq tilegin aqtardy.
Aıtalyq, jarysqa kelgen sportshylar 16 salmaq dárejesi boıynsha tatmıge shyǵatyn bolady. Sonyń ishinde 60-qa jýyq dzúdoshy Jetisý jeriniń namysyn qorǵamaq. Búgingi saıysta uldar 55-60 keli salmaqta óner kórsetse, qyzdar 44,48 jáne 52 keli salmaqta sheberlik baıqasty.
Jarysqa Almaty oblysynyń sańlaqtary tyńǵylyqty daıyndyqpen kelgendikterin dáleldep baǵýda. Solardyń biri taldyqorǵandyq sportshy, jastar arasynda QR-nyń chempıony jáne Evropa kýbogynyń ıegeri — Damır Bolatbek. Jerlesimiz búgin 55 keli salmaqta bes kezdesý ótkizip, aqtyq synda Qyzylorda oblysynyń sportshysyn utty. Osylaısha ol taǵy bir márte el birinshiliginde top jaryp otyr. – Bul saıysta jeńiske jetýime birden bir sebepker bolǵan jeke bapkerime jáne maǵan qoldaý kórsetken barlyq jankúıerlerime shynaıy alǵysymdy bildirgim keledi. Qarsylastarym myqty boldy, alaıda jaqsy daıyndyqtyń arqasynda jeńistiń dámin tattym, — degen jas balýan sátin salsa, endigide Azıa, Álem birnishilikterinde top jarýdy maqsat etip otyr.
Damır aqtyq synnyń birinshi aınalymynda jambasqa laqtyrý arqyly alǵa shyqsa, kelesi de qarsylasyna burap aınaldyrý tásilin qoldanyp, óziniń myqty ekenin dáleldep baqty.
Jarys 7 naýryzǵa deıin sozylady. Erteń uldar 66, 73, 81 kelide baq synassa, qyzdar 57, 63 jáne 70 kelide tatamıge shyǵyp, saıys kórkin qyzdyrmaq.
