Almaty oblysynyń ishki saıasat basqarmasy men Óńirlik komýnıkasıalar qyzmeti birlesip, Elbasy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda fotosýretshiler arasynda «Street photo» atty sheberlik sabaǵyn uıymdastyrdy. «Photo day Taldykorgan» jobasy osymen ekinshi márte uıymdastyrylyp otyr. Sheberlik saǵatyn Almaty qalasynan kelgen belgili fotosýretshi Manat Serikbaıuly ótkizdi.

Sheberlik saǵattyń maqsaty: ár sýrettiń tarıh betterinde qalý jolynda qyzmet etip júrgen fotosýretshilermen tájirıbe almasyp, óz bilgenimen bólisý.

Fotosýretshi óziniń jumystarymen úlken ekran arqyly «Kóshe sýretteri janry», strıt jáne lokasıa slaıdtaryn kórsetý arqyly tanystyrdy. Qylań etkendi qaǵyp alyp, kórermen jáne oqyrmanǵa jetkizetin qyraǵy kóz kásibı fotosýretshiniń bul salada júrgenine 7 jyldan astam ýaqyt bolǵan. Búginde «IDEAHUB» shyǵarmashylyq birlestiginiń múshesi, «Kóktem New Generation» kórmesiniń qatysýshysy bolyp otyr.

Jalpy sheberlik sabaǵy eki kezeńnen turdy. Birinshi teorıalyq sabaqta kamerany qalaı qoldanyp, jumys isteý joldary, shyǵarmashylyq oılardy qaıdan alýǵa, qaıdan izdeýge bolatyndyǵy týraly jáne «Kóshe sýretteri» janry jaıly aıtyldy. Ekinshi kezeńde Taldyqorǵan qalasyndaǵy «Sıtı plús» oıyn-saýyq ortalyǵy men eski ǵımarattardyń birinde praktıkalyq sabaq júrgizildi.

Fotosýretshi búginde uıaly telefonmen túsirý formatyna kóshken. Sebebi, ol ózińmen alyp júrýge yńǵaıly, ári ýaqyt jaǵynan da utymdyraq eken. Praktıkalyq saǵatynyń jańalyǵy da, úıreteri de osy uıaly baılanystyń kómegimen júzege asty.

«Kósheni sýretke túsirýdiń taǵy bir mańyzdy aspektisi – sýrettiń aldyn-ala kelisýsiz túsiriletindiginde. Sondyqtan, qoǵamdyq is-sharalarda túsirilgen fotosýretter kezdeısoqtyqpen erekshelenip turady»,- dedi Manat Serikbaıuly.

Sheberlik sabaǵyna Taldyqorǵan qalasynyń fotosýretshileri men sýretke túsirýdi jańadan bastap kele jatqan jas býyn ókilderi qatysty. Shara sońynda sheberlik sabaǵyna kelgen qatysýshylarǵa arnaıy sertıfıkattar tabystalyp, fotosýretshimen estelik sýretke tústi.