Bul týraly Óńirlik komýnıkasıalar ortalyǵynda ótken baspasóz máslıhatynda belgili boldy.
Oblystyq Kásipkerler palatasynyń adamı kapıtaldy damytý bóliminiń basshysy Almagúl Ońǵarbaevanyń aıtýynsha, óńirdegi isker áıelderdiń belsendiligi bızneste ǵana emes, qoǵamdyq-saıası ómirde de artyp keledi.
«Almaty oblysynda 1 mln-nan astam áıelder turady. Resmı málimetter boıynsha, búgingi tańda tirkelgen 110 myńnan astam kásipkerlik sýbektileriniń 42%-yn áıel azamattar basqarady. Iaǵnı, 50 myńnan astam bıznes-joba iske asyrylyp keledi. Názik jandylar ónerkásip, aýyl sharýshalyǵy, bank sektorynda, qyzmet kórsetý salasynda da tabysty qyzmet atqaryp keledi», – deıdi Almagúl Ońǵarbaeva.
Spıker aımaqtaǵy áıelderdiń iskerlik ortadaǵy belsendiligin arttyrý, ekonomıkalyq bastamalaryn qoldaý maqsatynda Kásipkerler palatasynyń janynan İsker áıelder keńesiniń qurylǵanyn atap ótti. Keńestiń barlyq aýdan men qalalarda fılıaldary bar. Búgingi tańda uıym 200-den astam kásipker, memlekettik, qoǵamdyq, qarjylyq uıymdardyń áıel basshylaryn biriktirip otyr. Ótken jyly jumys istep otyrǵan, jumyssyz, ózin-ózi qamtyǵan áıel kásipkerlerge oqytý semınarlary júrgizilgen.
2017 jyly 2,3 myńnan astam áıelge servıstik qyzmet, 5,6 myń áıelge aqparattyq qyzmet kórsetildi. İsker áıelder tarapynan jalpy somasy 2,4 mlrd.teńgeden astam 123 startap joba júzege asyryldy.
«Bıyl Kásipkerlerge qyzmet kórsetý ortalyqtarynda 700 áıelge tegin servıstik qyzmet, al 1,4 myńnan astam áıelge keńes berý jumystary júrgizilip keledi. Jyl basynan beri 56 áıel azamaty «Bıznes Keńesshi» jobasy boıynsha kásipkerlik negizine oqyp shyqty», – dep atap ótti Almagúl Ońǵarbaeva.
İsker áıelder keńesiniń Kerbulaq aýdandyq fılıalynyń jetekshisi, «Amreeva» JK basshysy Kúlsara Ámireeva ótken jyldyń qyrkúıeginde «Atameken» UKP bastaý alǵan «Atamekenim» respýblıkalyq aksıasy aıasynda áleýmettik jobalar iske asyryp keletinin aıtty.
«Oblysymyzdyń alty qalasy men aýylynda «Bári de rahmet úshin!»atty áleýmettik dúkenderi jumys isteýde. Onda muqtaj azamattarǵa kıimder men zattar tegin beriledi. Jobanyń arqasynda adamdar qoǵamnyń basqa bir ókiline meıirimdilik tanytýda. Sonymen birge, Kerbulaq aýdanynda «Shyn júrekten» atty avtokerýen uıymdastyryp, bineshe apta boıy ákimdik, memlekettik organ men qoǵamdyq uıymdarmen birlese 15 aýyldyq okrýgti aralap shyqtyq. Aýylda turyp jatqan 400-den astam az qamtylǵan, múgedek jáne qart azamattarǵa qaıyrymdylyq kórsetildi», – dedi Kúlsara Ámireeva.
