"Atameken" Ulttyq káspkerlik palatasy Talǵar aýdandyq fılıalynyń uıymdastyrýymen "Talǵar Asar" qaıyrymdylyq sharasy Talǵar qalasynda ornalasqan "Aromatnyı mır" sýpermarketterinde ıgi ister jasalýda. Bul aksıaǵa ár bir jan óz úlesin qossa bolady, ıaǵnı, azyq túlikti satyp alyp, kómek kórsetý sórelerine qoıady. Ol sórelerden az qamtylǵan jandar, kóp balaly otbasylar, qart adamdar kómek alýlaryna bolady. Osyndaı qaıyrymdylyq sharalaryna belsene at salysýǵa suranys tastady.

Atalmysh jobany talǵarlyqtar qaıyrymdylyq mádenıetin damytý men áleýmettik jaýapkershilikti joǵarylatýǵa baǵyttalǵan «Atamekenim» respýblıkalyq aksıasy aıasynda iske asyryp otyr.

«Talǵar Asar» jobasynyń bastamashylarynyń biri tanymal kásipker, «Aromatnyı mır» sýpermarket jelileriniń dırektory Sergeı Maıboroda. Ol bıznes ókilderin áleýmettik bastalamalardy iske asyrýǵa belsendi qatysýy kerektigin aıtady.

«Bizdiń qalamyz ben aýdanymyzda áleýmettik kómekke zárý azamattar óte kóp. Dúkende jınalǵan barlyq azyq-túlik pen taýarlardy az qamtylǵan otbasylarǵa, múgedek jandarǵa, basqa da muqtaj adamdarǵa tikeleı jetkizýdi qarastyryp otyrmyz. Áleýmettik kómek kórsetiledi. Bastamamyzdy Talǵardyń ózge de qaıyrymdy kásipkerleri qoldaıdy dep senemiz», – dep atap ótti kásipker.

«Dana» jekemenshik mektebi men «Erkem-aı» balabaqsha jelisiniń dırektory, Qazaqstan mektepke deıingi bilim berý uıymdary qaýymdastyǵynyń Almaty qalasy jáne Almaty aımaǵy boıynsha fılıalynyń jetekshisi Kúlánda Batyrbekovanyń sózinshe, ıgi ister jaqsy ádetke aınalyp qana qoımaı, qoǵamnyń trendine aınalýy tıis.

«Halqymyzda «Asar» sózi mańyzdy uǵymdy bildiredi. Jobamyzdy «Talǵar Asar» dep ataý arqyly bir-birimizge qol ushyn sozýdy umytpaýdy eske salǵymyz keldi. Sórelerge «Jaqsylyq jasaýǵa asyǵaıyq!» dep jazyp qoıdyq. Óıtkeni qaıyrymdylyq pen meıirimdilik isteriniń úlken-kishisi joq», – deıdi Kúlánda Batyrbekova.

«Talǵar Asar» jobasy aıasyndaǵy sórelerdi qaladaǵy jáne Talǵar aýdanyndaǵy saýda núktelerinde de ashý josparlanyp otyr.

«Aı saıyn kásipkerler sórelerdi qajetti azyq-túlikter men taýarlarǵa toltyryp otyrady. Qazir osyndaı sórelerdi basqa da saýda oryndarynda ashý josparlanyp otyr. Jalpy talǵarlyq kásipkerler aýdanymyzdyń qoǵamdyq, áleýmettik ómirine belsene at salysyp keledi. Qaıyrymdylyq bıznes ókilderi qyzmetiniń ajyramas bóligine aınalǵan. Mysaly, Tuıaq Esqojına basqaratyn «Nur» balalar úıi kásipkerlerdiń qamqorlyǵyna alynǵan. Múmkindigi shekteýli balalar men múgedekter uıymdary da kásipkerlerdiń asa mańyzdy nazarynda», – deıdi Kásipkerler palatasynyń Talǵar aýdandyq fılıalynyń basshysy Erjan Turalyqov.

Aıta keteıik, «qaıyrymdylyq sóreleri» osyǵan deıin Tekeli qalasynda ashylǵan bolatyn. İsker áıelder keńesiniń bastamasymen Almaty oblysynyń birneshe qalalary men aýyldarynda «Bári de raqmet úshin!» áleýmettik dúkenderi jumys isteıdi.