Elimizde ákelerge arnalǵan talbesik.kz qazaq tilindegi alǵashqy tanymdyq-tárbıelik saıt ashyldy. Joba jetekshisi ári redaktory Azamat Bıtannyń  aıtýynsha, osy baǵyttaǵy jumystardyń qajettiligi qazirgi qazaq qoǵamy úshin óte mańyzdy.

«Shyny kerek, «atyp ketti», «ajyrasyp tynypty», «búıtip qoıǵan» degen sekildi jańalyqtardan áleýmet mezi boldy. Qoǵam paıdaly dúnıeni oqýǵa da, taratýǵa da daıyn. Onyń ústine bul ákelerge arnalǵan alǵashqy saıt. Sondyqtan kóp jaýapkershilik júkteıdi. Ázirge jıǵan-tergenimdi jumsap jalǵyz bastadym. Baqylap, baıqap kóremin. Eger usynǵan dúnıelerim oqyrman tarapynan oń qabyldanyp jatsa, birqatar jobalardy qolǵa alsam deımin. Ósek pen tósek týraly jańalyqtardy ańdyǵandar bar. Talǵamy joǵary, ýaqytynyń qadirin biletinder de az emes degen oıdamyn. Bastysy osy baǵyttaǵy alǵashqy qadamdar bastaldy», - deıdi joba avtory Azamat Bıtan.

Saıt Alashtyń áldıi, Tilashar, Pedagogıka, Psıhologıa, Alań sekildi aıdarlardan turady. Oqyrman qaýymǵa Alash arystarynyń áli kúnge deıin mektep oqýlyqtarynda basylmaı kele jatqan birqatar shyǵarmalary, áke men balaǵa qatysty tárbıelik maqalalar, qazaqtyń ulttyq tárbıesi men jalpy bala tanymyna qatysty tanymdyq materıaldar usynylady. Sonymen qatar, qoǵam qaıratkerleri men pedagogtar, ár salada belgili bir jetistikterge qol jetkizgen tanymal tulǵalardyń qatysýymen «Ákemen áńgime» atty arnaıy joba jumys isteı bastaǵan.