15 aqpan kúni qazaqstandyq quqyq qorǵaýshy Baqytjan Tóreǵojına Facebook-tegi paraqshasynda prezıdent Nursultan Nazarbaevtyń atyna «Qazatomónerkásip» ulttyq kompanıasynyń burynǵy basshysy Muhtar Jákishevke raqymshylyq jasaý týraly jazylǵan úndeý hatqa qol jınaýdy bastaǵan dep jazady Qamshy.kz aqparat agenttigi.

Úndeýde Muhtar Jákishevtiń júrek-qan tamyrlary dertine shaldyqqany týraly aıtylyp, densaýlyǵy nashar dep habarlaǵan bolatyn.

Úndeý hatqa 5  myńǵa jýyq adam qol qoıǵan. Qol qoıǵandardyń arasynda Jalpyulttyq sosıal-demokratıalyq partıa saıası keńesi prezıdıýmynyń tóraıymy Záýresh Battalova, «Qoǵamdyq problemalardy taldaý ortalyǵy» qoǵamdyq qory dırektory Merýert Mahmutova, «Teń quqyly jýrnalıser federasıasy» prezıdenti Rozlana Taýkına, tarıhshy profesor Baqytnur Otarbaeva, jýrnalıs Vadım Boreıko jáne ózgeler bar. Hatqa parlamenttiń burynǵy depýtaty Aıgúl Soloveva «Zań múmkindik beredi, sondyqtan bosatýdy qoldaımyn» degen sózder jazyp, qol qoıǵan.

Qazaqstandyq quqyq qorǵaýshy Baqytjan Tóreǵojına 23 naýryz kúni Facebook-tegi paraqshasynda úndeý hattardyń bárine Qazaqstannyń bas prokýratýrasynan «joq» degen jaýap kelgenin habarlady.

Bas prokýratýranyń jaýabynda «Raısa Jákishevanyń balasy Muhtar Jákishevtiń múddesine qatysty ótinishin qoldaǵan úndeý hat Qazaqstan Respýblıkasy prezıdenti ákimshiliginen túsip, qaraldy, biraq zańǵa sáıkes, Qazaqstan Respýblıkasy prezıdentine raqymshylyq jasaý týraly ótinishpen sottalǵan adamnyń ózi júginýi tıis» dep jazylǵan.

«Sottalǵan adam ótinishti jazany atqarý mekemesi ákimshiligi arqyly beredi. Al mekeme sottalǵan adamnyń ótinishine oǵan qatysty aryzdaǵy talaptar men ótelmegen qaryzy týraly anyqtama sıaqty birqatar qujattardy tirkeıdi» delingen bas prokýratýranyń jaýabynda.