«Zımnáá vıshná» oıyn-saýyq ortalyǵynda bolǵan 31 jastaǵy Mıhaıl Trýsov órtten qalaı aman qalǵanyn aıtyp berdi. Alaıda eki qyzynan aıyrylǵan.

Qazirgi ýaqytta ol Kemerovo oblystyq klınıkalyq aýrýhanasynda emdelip jatyr.

Sol kúni Mıhaıl eki qyzymen kınoteatrǵa barǵan. Áıeli úıde qalady.

«Zalda 30-40 adam bolǵan. Adamdar tútinniń ıisin seze bastady da, esikke qaraı júgirdi. Biraq esik jabyq turdy. Al órt bastalǵanyn zaldaǵylarǵa eshkim eskertpegen», - dep eske aldy er adam Rıa Novostı portalyna bergen suhbatynda.

Onyń aıtýynsha, adamdar 15 mınýt boıy kómek kútken. Eshkim kelmegendikten ózderi áreket etýge kirisedi.

«Adamdar qosalqy esikten shyqpaq bolyp, qulpyn julyp aldy. Biraq shyǵýǵa qoryqty, sebebi aınalany órt pen tútin jaılap alǵan. Al men kómekke adam shaqyrý úshin zaldan shyǵyp bara jatqan jerimde esimnen tanyp qaldym. Qudaıǵa shúkir, meni baıqap qalǵan eken. Telefonymnyń jaryǵy kózge túsken bolý kerek, meni sol jerden alyp shyqty. Jedel-járdem kóliginde ólip ketem be dep oıladym. Biraq ókpemdi tazalap, tynys alýym qalypqa kele bastady», - dedi Mıhaıl.

Er adamnyń qazirgi jaǵdaıy birqalypty. Mıhaıl  ózinen basqa eshkimniń zaldan shyǵa almaǵanyn aıtady.