2018 jylǵy 27 naýryzynda Islamabad qalasynda Qazaqstan Respýblıkasynyń Elshisi Barlybaı Sadyqov Pákistan Islam Respýblıkasynyń Prezıdenti Mamnýn Hýssaınge senim gramotalaryn tapsyrdy. Saltanatty rásim «Aiwan-e-Sadr» saraıynda ótti, dep habarlaıdy Qamshy.kz aqparat agenttigi QR Syrtqy İster mınıstrliginiń baspasóz qyzmetine silteme jasap. 

Saltanatty rásimnen keıin ekijaqty jáne kópjaqty formattardaǵy yntymaqtastyqtyń aǵymdaǵy jaǵdaıy men onyń keleshegi jónindegi máseleler talqylandy.

Pákistan Prezıdenti Qazaqstanmen yntymaqtastyq máselelerine Islamabad erekshe mán beretinin ataı otyryp, ásirese saýda, kólik jáne mádenı almasý salalaryndaǵy yntymaqtastyqty jandandyrýdy usyndy. M.Hýssaın Qazaqstannyń Prezıdenti Nursultan Nazarbaev Pákistanda úlken qurmetke ıe ekenin ataı otyryp, Elbasy– aımaqtaǵy memleketterdiń beıbitshiligi, qaýipsizdigi men ekonomıkalyq damýy úshin Ortalyq Azıa men Ońtústik Azıa memleketteri arasyndaǵy baılanystardy nyǵaıtýdyń óte mańyzdy ekenin túsinetin kóregen kóshbasshy ekenin erekshe atady.

Pákistan Prezıdenti 2017 jyldyń qyrkúıeginde Astana qalasynda ótken Islam Yntymaqtastyq Uıymynyń samıtine qatysqanyn, sondaı-ak halyqaralyq jáne aımaqtyq uıymdar sheńberinde yntymaqtastyq pen ózara qoldaý kórsetýdi jalǵastyrýdyń mańyzdylyǵyn atap ótti.

Barlybaı Sadyqov óz kezeginde, Pákistan Prezıdentin Qazaqstan Prezıdenti N.Nazarbaevtyń bastamasymen elimizde iske asyrylyp jatqan aýqymdy ekonomıkalyq jáne saıası reformalarmen tanystyrdy. Bul turǵyda iske asyrylyp jatqan reformalar ekonomıka men qoǵamdyq sanany jańǵyrtýǵa baǵyttalǵanyn, ol óz kezeginde 2050 jylǵa deıin Qazaqstannyń aldyńǵy qatarly damyǵan 30 memlekettiń qataryna kirýin qamtamasyz etýdi kózdeıtinin jetkizdi.

Sondaı-aq dıplomat, Qazaqstan basshylyǵy aımaqtyq jáne halyqaralyq qaýipsizdikti nyǵaıtýǵa turaqty túrde kúsh salyp jatqanyn atap ótti. Bıyl qańtarda Elbasy N.Nazarbaevtyń tóraǵalyǵymen BUU Qaýipsizdik Keńesiniń ıadrolyq qarýsyzdaný jáne taratpaý salasyndaǵy senim sharalaryn nyǵaıtý taqyrybyna arnalǵan otyrysy, sondaı-aq Aýǵanstan jáne Ortalyq Azıa memleketteriniń Syrtqy ister mınıstrleri deńgeıinde kezdesýleri ótti. Ońtústik Azıada turaqtylyqty nyǵaıtýǵa jáne Aýǵanstanda beıbitshilikti ornatýǵa qyzyǵýshylyq tanytatyn memlekettermen Qazaqstan tyǵyz ózara-isqımyldar ornatý men ony júrgizýge daıyn ekeni týraly málimdendi. Sondaı-aq, Elshi Ortalyq Azıa elderin Ońtústik Azıanyń teńiz porttaryna shyǵýy úshin tranzıttik-kóliktik baǵyttardy damytý mańyzdy ekenine toqtaldy .

B.Sadyqov, Qazaqstan tarapynyń Pákistanmen ekijaqty jáne kópjaqty formattarda ózara tıimdi yntymaqtastyqty odan ári damytýǵa daıyndyǵyn ekenin atap ótti.