Almatyda «Atamekenge oral, Alash balasy» atty dóńgelek ústel ótti. Jıynda sheteldegi qazaqtardyń jappaı kóshýine kedergi bolyp otyrǵan kórshi elderdegi saıası jáne áleýmettik máseleler talqylandy. Qytaıdaǵy qandastarymyzdyń qazirgi jaı-kúıi de aıtyldy, dep habarlaıdy Qamshy.kz aqparat agenttigi.

Basqosý barysynda «Bolashaq» jastar qozǵalysy syrttaǵy qandas baýyrlarǵa úndeý jarıalap, elge oralýǵa shaqyrdy. «Azamattar, atajurtqa qaıtatyn ýaqyt boldy, kóshtiń basyn buryńdar», - dedi qozǵalys jetekshisi Dáýren Babamurat.

Saıasattanýshy Dos Kóshimniń aıtýynsha,  polıtologıada «Tańdaý quqyǵy» degen baǵyt bar. Bul baǵyt boıynsha adamdar óz taǵdyryn ózderi sheshedi. Shetelde qalyp, jat jurtqa jutylyp kete me, sonda otyryp ulttyq qundylyǵyn saqtaı ma, álde tarıhı Otanyna orala ma – ol árkimniń óz erkinde. «Biraq biz úshin qaıyrlysy osy sońǵy nusqa bolar edi», - deıdi Dos Kóshim.

Al «Jas qazaq» gazeti bas redaktorynyń orynbasary Eldos Ómirzaq syrttaǵy qazaqtardy elge tartýdyń tıimdi amaldaryn oılastyrýdy usyndy.

«Áleýmettik jelide Qytaıdan traktormen kóship kelgen qandasymyz týraly vıdeo tarady. Sol kisini nege úlgi etip kórsetpeske? Kishigirim rolık túsirip degendeı. Óıtkeni ol – óz eline shynaıy patrıottyq sezimmen, aq-adal nıetpen kelgen azamat», - dedi jýrnalıs.

Aıta keteıik, Qytaı, Mońǵolıa, Ózbekstan, Reseı, Túrkimenstan, Iran, Túrkıa, Aýǵanstan elderinde mıllıondaǵan etnıkalyq qazaq ómir súrip jatyr.  Táýelsizdik alǵan sátten bastap qandastarymyz qarqyndy túrde elge qaıtsa, sońǵy jyldary atamekenge syrttan keletin qazaqtyń legi saıabyrlaǵan. Statısıkaǵa súıensek, sheteldegi qazaqtardyń 15-18 paıyzy ǵana Qazaqstanǵa oralǵan.

Qamshyger – Erlan Tóleýbaı