Denesi men basynan ıne tabylyp, asqazany ýly suıyqtyqtan ýlanǵan segiz jastaǵy Aınanyń ákesi zańger Aıgúl Orynbekpen kezdesip, oqıǵanyń mán-jaıyn baıandap berdi. Qyzdyń ákesimen suhbat barysynda zańger Facebook jelisinde tikeleı efırge shyqty, dep habarlaıdy Qamshy.kz aqparat agenttigi. 

Ákesiniń qaýipsizdigi úshin Aıgúl Orynbek onyń túrin jasyryn ustap, esimin atamaýdy jón sanady.

«Qazir qyzdyń jaǵdaıy jaqsy, Arýjan Saınn aıtqandaı 8 keli emes, 17 kelige deıin jetti. Sabaǵyna baryp júrdi. Men ol kisige kómek surap barǵan edim, biraq ol ústimizden is qozǵap jiberdi», - deıdi ákesi. 

Ákesiniń aıtýynsha, Arýjan Saınmen jolyqpaı turyp ta, qyzǵa talaı márte ota jasalǵan. Al Arýjan bolsa ata-ana quqyǵynan aıyrý boıynsha árekettenip, qyzdy balalar úıine tabystamaq bolǵan. Qyzdyń ákesi buǵan túbegeıli qarsy. Sebebi olardyń qyzdaryna degen meıirimi men mahabbaty sheksiz eken.

«Ol balalar úıinde bizdi izdep, saǵynatyn bolady. Ol jerge úırenise almaıdy. Sebebi bizdiń meıirimimizge bólenip ósti», - deıdi ákesi.

Aıta keteıik, Arýjan Saınnyń bastamasymen quqyqqorǵaý organdary QR QK 1 bólimi 141 baby boıynsha qylmystyq is qozǵady. Alaıda tergeý jumystary nátıjesinde, ata-ananyń áreketinen qylmys quramy tabylmady. Qylmystyq is toqtatyldy. Degenmen qoǵam qaıratkeri áli kúnge deıin qyzdyń ákesinen kúdiktenetin kórinedi. Buǵan er adam qapaly.

«Men tergeýden budan buryn da qashpaǵanmyn. Búgin de daıynmyn. Prokýratýraǵa deıin kelip ekspertıza jasatsyn, men oǵan daıynmyn. Tek qyzym emdelse bolǵany», - dedi ol.

Al qyzyna kimniń qastandyq jasaýy múmkin ekeninen ákesi habarsyz. Onyń sózine qaraǵanda, buǵan deıin áıeli ekeýinen ózge jaqyn týystary men kórshilerine deıin tergelgen. Biraq kúdikke iliner bir jan tabylmady. Er adam muny «jumbaq jaǵdaı» dep otyr.

Eske salaıyq, Arýjan Saın óziniń Facebook paraqshasynda 2011 jylǵy Aına esimdi qyzǵa qatysty jantúrshigerlik málimetter jarıalaǵan. Al búgin Túrkistandaǵy bılik ókilderi qyzdy tolyqtaı óz baqylaýyna alǵanyn málimdedi.