ESPN telearnasymynyń mamany jáne AQSH-taǵy eń ataqty sholýshylardyń biri Den Rafael orta salmaqtaǵy WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkınge (37-0-1, 33 KO) eger onyń 5-mamyr kúnge josparlanǵan meksıkalyq Saýl "Kanelo" Alvarespen (49-1-2, 34 KO) kezdesýi ótpeı qalatyn bolsa, kimniń laıyqty qarsylas bolatynyn atady, dep habarlaıdy Qamshy.kz aqparat agenttigi vesti.kz-ke silteme jasap.
Buǵan deıin Rafael Golovkın men "Kanelo" arasyndaǵy 5-mamyrǵa josparlanǵa ekinshi kezdesýdiń dál ýaqytyndaı ótpeı qalýy múmkin ekeni týraly pikir bildirdi. Óıtkeni, ekinshi jekpe-jektiń máselesi "Kanelonyń" qansha ýaqytqa shettetilitine tikeleı baılanysty. Sondyqtan da maman Golovkın jýyq arada basqa boksshymen kezdesedi dep esepteıdi.
Rafaeldiń aıtýynsha, Golovkınge aldaǵy ýaqytta eń tıimdi qarsylasy orta salmaqtaǵy WBO belbeýiniń ıegeri Bıllı Djo Sonders (26-0, 12 KO) eken. Eger bul jekpe-jekti uıymdastyryp, Golovkın jeńetin bolsa, onda ol absolútti chempıon atanady.
Maman ekinshi nusqa retinde ótken jyly naýryzda otandasymyzdan jeńilgen amerıkalyq Denıel Djeıkobsty (33-2, 29 KO) aıtyp otyr. Amerıkalyq boksshy Triple-G-ge 12 raýnd tótep bergen birinshi boksshy atanyp edi.
Sonymen qatar bul tizimge ýkraınalyq Sergeı Derevánchenko (12-0, 10 KO), amerıkalyq Demetrıýs Andrade (25-0, 16 KO) sekildi boksshylar kirgen.
Naýryz aıynyń basynda Alvarestiń 17 jáne 20 aqpanda tapsyrǵan dopıng-synamasynan klenbýterol degen tyıym salynǵan zattyń tabylǵany habarlanǵan. Boksshynyń komandasy muny jelingen ettiń quramynda boldy dep túsindirgen. Kelesi úsh dopıng-synaqty meksıkalyq AQSH-ta tapsyryp, onda tyıym salynǵan zat tabylmaǵan.
Eske sala keteıik, 5 mamyrǵa belgilengen Golovkın - Alvares arasyndaǵy revansh mach Las-Vegasta T-Mobile arenasynda ótedi.
Golovkın men Alvarestiń alǵashqy jekpe-jegi 2017 jyldyń 16 qyrkúıeginde Las-Vegasta ótken bolatyn. 12 raýndqa sozylǵan jekpe-jek teń eseppen aıaqtalǵan edi.
Pikir qaldyrý