Tarazda  oqýshy qyzǵa azǵyndyq jasamaq bolǵan azamat qolǵa tústi dep habarlaıdy Qamshy.kz aqparat agenttigi Almaty arnasyna silteme jasap.

Aıýandyq áreketke barǵysy kelgen 21 jastaǵy jigitti jergilikti taksıst pen oqýshy qyzdyń ustazy birigip ustap bergen. Qashyp qutylmasyn bilgen jas jigit aram oıynyń bolǵanyn moıyndaǵan.

Áleýmettik jelide №8 mektepte oqıtyn 3-shi synyp oqýshysyn zorlamaq boldy degen kúdiktiniń sýreti jarıalanǵan. Ertesine onyń kóshede júrgenin sol oqýshynyń muǵalimi kórip qalady. Jigitti jalǵyz ózi qolǵa túsirýge áli kelmeıtinin bilgen soń, ustaz kóshedegi taksısten kómek suraıdy. Bekbolat Dosanov sózge kelmeı birden kóligine otyryp, kúdiktiniń izine túsedi. Qashamyn dep ábden sharshaǵan jigit aqyry ustalǵan.

Al kúdiktiniń ózi qolǵa túsken kezde oqýshy qyzǵa azǵyndyq kórsetip, aram oıyn júzege asyrǵanyn aıtady. Biraq mektep dırektory bolsa, shákirtim jábir kórgen joq, oǵan medısınalyq tekserýler dálel, deıdi. Bilim ordasy basshylyǵynyń aıtýynsha, 3-shi synyp oqýshysyn jaqyndary mektepke jetkizbeı jarty jolda qaldyryp ketken.  Dál sol kezde 21 jastaǵy kúdikti jetkinshekti tunshyqtyryp, podezge súıregen. Kýágerler kórip aıǵaı salǵan soń, aram pıǵyly iske aspaı qashyp ketken. Qazir kúdikti ustalǵan kezdegi  beınejazba áleýmettik jelige tarap, qyzý talqyǵa túsip jatyr. Kóbisi ustalǵan azamattyń aqyl-esinde aýytqýshylyq bolýy múmkin degen pikirdi alǵa tartýda.

«Eki qyz kórip qalmaǵan kezde bári basqasha bolýy múmkin edi. Biraq baqytymyzǵa, qýanyshymyzǵa oraı, ondaıdyń aldyn aldyq dep aıtýǵa bolady», - dedi  Taraz qalalyq №8 gımnazıa dırektorynyń mindetin atqarýshy Álisher Ázimbaı.

Rasymen de qamaýǵa alynǵan jigit psıhologıalyq dıspanserde 10 jyldan beri tirkeýde turǵany anyqtalypty. Qazir ol qamaýǵa alynyp, tergeý amaldary júrgizilýde. Al zábir kórgen qyzben psıhologtar jumys istep jatyr. Osy oqıǵadan keıin Tarazdaǵy mektepterde tártip kúsheıtilgen.