Qazaqstan Respýblıkasynyń Tótenshe jáne Ókiletti Elshisi Kárim Kókirekbaev 30 naýryzda Qyrǵyz Respýblıkasynyń Prezıdenti Sooronbaı Jeeenbekovke senim gramotasyn tapsyrdy, dep habarlaıdy Qamshy.kz aqparat agenttigi QR SİM baspasóz qyzmetine silteme jasaı otyryp.
Saltanatty rásim barysynda Qyrǵyz Respýblıkasynyń Prezıdenti Elshini dıplomatıalyq qyzmetiniń resmı bastalýymen quttyqtap, bul qurmetti mısıa bizdiń elderimiz arasyndaǵy baýyrlastyq, tatý kórshilik jáne ózara tıimdi qatynastardyń odan ári damýyna yqpal etetinine senimdilik bildirdi. Qyrǵyz Respýblıkasynyń Prezıdenti óziniń qysqa ýaqyt ishinde Qazaqstannyń elordasy Astanada resmı saparmen jáne Ortalyq Azıa memleketteri basshylarynyń kezdesýinde eki ret bolǵanyn atap ótti.
«Bul saparlar kezinde mańyzdy qujattarǵa qol qoıylyp, ózekti máseleler talqylandy. Sizdiń Qyrǵyzstanǵa Elshi bolyp taǵaıyndalýyńyzǵa óte qýanyshtymyn, ári bizdiń qarym-qatynastarymyz keleshekte tereńdeı túsedi dep senemin, óıtkeni qyrǵyzdar men qazaqtar sıaqty bir-birine jaqyn halyq joq», - dedi Prezıdent S. Jeeenbekov.
Óz tarapynan K. Kókirekbaev mádenı-gýmanıtarlyq jáne ekonomıkalyq salalarda eki halyqtyń yntymaqtastyǵyn nyǵaıtýǵa berilgen múmkindik úshin alǵysyn bildirdi. Ol eki baýyrlas halyqtar arasynda qalyptasqan senimdi dıalog qomaqty sharttyq-quqyqtyq bazamen jáne Qyrǵyzstan Prezıdenti S.Jeenbekovtiń Qazaqstanǵa resmı sapary sheńberinde qol qoıylǵan tarıhı qujattar: Qazaqstandyq-qyrǵyz memlekettik shekarasyn demarkasıalaý týraly Shartpen jáne Shekara rejimi týraly Kelisimmen aıqyndalatynyn atap kórsetti.
