Pavlodardaǵy «Máshhúr Júsip» ortalyq meshitinen Aıagózdegi apattan zardap shegýshilerge kómek retinde «Ertis-Pavlodar járdemi» qaıyrymdylyq kerýeni jiberildi, dep habarlaıdy Qamshy.kz aqparat agenttigi pavlodarnews.kz saıtyna silteme jasaı otyryp.
Aksıa aıasynda Pavlodar oblysyna qarasty qala, aýdan, aýyl meshitteri arqyly 30 tonnadan astam azyq-túlik pen kıim-keshek jınalǵan.
«Naýryz aıynyń basynda Aıagózdegi alapat sý tasqyny bolǵan kúnniń erteńinde QMDB-dan elimizdegi barlyq meshitke apatqa ushyraǵan aǵaıynǵa barynsha qaıyr qylý týraly tapsyrma berilgen edi, — dep atap ótti baspasóz qyzmeti. – QMDB Pavlodar oblysy ókildigi osy tapsyrmaǵa sáıkes, ári musylmandyq jáne adamgershilik paryzy retinde tasqynnan zardap shekkenderge kómek kórsetý maqsatynda «Ertis-Pavlodar járdemi» atty qaıyrymdylyq aksıasyn uıymdastyrǵan bolatyn. Aksıa aıasynda Pavlodar oblysyna qarasty qala, aýdan, aýyl meshitteri arqyly 30 tonnadan astam azyq-túlik pen kıim-keshek jınalǵan», dep jazady jergilikti meshittiń baspasóz qyzmeti.
30 naýryz, qasıetti juma kúni qaıyrymdylyq kerýenin «Máshhúr Júsip» ortalyq meshitiniń bas ımamy Joldas Berdimuratov bata berip, jolǵa shyǵaryp saldy.
