Kemerovo oblysynyń gýbernatory Aman Tóleev RF prezıdenti Vladımır Pýtınge óz erkimen qyzmetinen ketý týraly ótinish tapsyrdy, dep habarlaıdy TASS.

A. Tóleev Kemerovodaǵy qaıǵyly oqıǵadan soń eń durys sheshim osy ekenin málimdegen.

— Kemerovoda 25 naýryzda bolǵan jantúrshigerlik qaıǵyly oqıǵaǵa qabyrǵamyz qaıysyp otyr. Biz 64 adamnan aıyryldyq, olardyń kópshiligi - balalar. Árqaısymyz osynaý aýyr qaıǵyny júregimizden ótkizdik, - deıdi Aman Tóleev.

— Bul ózim úshin durys,  eń ádil sheshim dep esepteımin, óıtkeni mundaı aýyr júkpen gýbernator bolyp otyrý kerek emes, moraldyq turǵydan múmkin emes, - dedi ol.

Sonymen qatar ol qolynan kelgenniń bárin istegenin aıtty. «Men qolymnan kelgenniń bárin istedim, kómek kórsetý máselelerin sheshýge tyrystym. Zor qaıǵyǵa taǵy bir ret ortaqtastyq bildiremin. Biraq ómir súrý kerek qoı, marqumdar jadyn saqtaý úshin ómir súrý kerek», - dedi gýbernator.

«Qudaı aldyndaǵy adaldyǵymdy aıtaıyn, men óz qyzmetimde árqashan eldiń, Reseıdiń múddesin, oblystyń múddesin oıladym. Barshańyzǵa únemi, qýanyshymda da, qaıǵymda da birge bolǵandyqtaryńyz úshin taǵy bir ret rahmet. Taǵzymymdy qabyl alǵaısyzdar», - dedi Aman Tóleev.

73 jastaǵy Aman Tóleev Kemerovo oblysyn 1997 jyldan beri basqaryp keledi.