«Qazaqstan arýy-2018» ataǵyn Atyraýdan kelgen 16 jastaǵy Alfıa Ersaıyn jeńip aldy, dep habarlaıdy Qamshy.kz aqparat agenttigi sputniknews.kz saıtynyń deregin negizge ala otyryp.

«Qazaqstan arýy» atanǵan Alfıa Ersaıyn Atyraý gýmanıtarlyq kolejiniń stýdenti. 

III vıse-mıss ataǵyn «Semeı arýy» Dınara Baımuratova ıelendi. 

II vıse-mıss ataǵy Astanadan qatysqan 19 jastaǵy Maımýna Kúlkeshovaǵa buıyrdy. Ol Qazaq tehnologıa jáne bıznes ýnıversıtetiniń 2-kýrs stýdenti.

«Qaraǵandy arýy» 19 jastaǵy Ekaterına Dvoreskaıa İ vıse-mıss atandy.  Halyqaralyq qatynastar jáne álemdik tilder ýnıversıtetiniń 2-kýrs stýdenti. Baıqaýǵa osymen ekinshi ret qatysyp otyr.  

Búgin Astanadaǵy Beıbitshilik jáne kelisim saraıynda 21-shi jyl saıynǵy «Qazaqstan arýy» ulttyq baıqaýynyń fınaly ótti. Sulýlyq baıqaýyna elimizdiń túkpir-túkpirinen 30 boıjetken qatysty.

Baıqaý ashyqtyǵyn qamtamasyz etý úshin ádil qazylar alqasy úzdik bestikti iriktedi. Al Qazaqstannyń eń sulý arýyn qazaqstandyqtar onlaın-daýys berý arqyly tańdady.

Jańa jeńimpaz arýǵa tájdi qyzylordalyq Gúlbaný Ázimhanova tapsyrdy.

Fınalda ulttyq, sándi kıimder sıaqty dástúrli kórsetilimnen bólek, kórermender nazaryna talanttar shoýy usynyldy. Atalǵan shoýda úmitker bes qyz óner kórsetti.  

Aıta ketsek, ulttyq baıqaýdyń fınalynda ár qalanyń jeńimpaz atanǵan 20 arýy ǵana emes, Instagram-kastıngi arqyly iriktelgen 10 boıjetken de baq synady. Áleýmettik jelidegi kastıng aqpan aıynda ótken bolatyn, oǵan 17 men 25 jas aralyǵyndaǵy qyzdar qatysty. Jyl saıyn Qazaqstannyń eń sulý arýy jeltoqsan aıynyń sońynda tańdalatyn. Bıyl 21 jyl ishinde alǵash ret ulttyq baıqaý fınaly 31 naýryzda ótti jáne tabıǵattyń jańarý meıramy – Naýryzǵa arnaldy.

Baıqaý bıletterin satýdan túsken barlyq aqsha Astanadaǵy qaıyrymdylyq sharalarǵa jumsalady. «Qazaqstan arýy» jeńimpazyna 3 mıllıon teńge aqshalaı syılyq, dástúrli qyz jasaýy tabystalady. Sonymen qatar jeńimpaz arý tanymal brendtermen jarnama kelisimshartyn bekitip, Qazaqstan atynan «Álem arýy-2018» baıqaýyna qatysýǵa joldama alady.

Bıyl baıqaýǵa  prezıdenttiń «Altyn sapa» syılyǵynyń laýreaty, «Altyn Orda» úıiniń negizin qalaýshy Yrza Tursynzada, «Wyndham Garden» halyqaralyq qonaq úıiniń bas dırektory Qaırat Jánibekov, 2012 jylǵy Olımpıada oıyndarynyń chempıony, jeńil atlet Olga Rypakova, Qazaqstannyń eńbek sińirgen qaıratkeri, sýretshi-restavrator Qyrym Altynbekov, tanymal akter, telejúrgizýshi Táýekel Múslim, «Qaraǵandy arýy-2013», baıqaý tarıhynda alǵash ret «Qazaqstan ınternet arýy» atanǵan Dıana Keńesova, prodúser, telejúrgizýshi Leıla Sultanqyzy, «Astana Opera» teatrynyń jetekshi solısi Súndet Baıǵojın, «Qazaqstan arýy» baıqaýynyń «Sulýlyq pen qaıyrymdylyq» áleýmettik baǵdarlamasynyń dırektory Sovet Seıitov, Qazaqstannyń ozyq fashion-prodúseri, dızaıner Sáken Jaqsybaev jáne «Qazaqstan arýy» ulttyq baıqaýynyń tóraıymy Alena Rıvlına-Kyrbasova qazylyq etti.

Sondaı-aq, baıqaýda ánshi Adam, «Samaıa vyshka» atty sońǵy hıtimen Raim&Artur dýeti, «Astana Opera» teatrynyń solısi Súndet Baıǵojın óner kórsetti.