Álemge tanymal fýtbolshy Krıshtıaný Ronaldýǵa shapan tikken mańǵystaýlyq dızaıner, «Nur-SHah» sán úıiniń ıesi jáne «Mańǵystaý oblysynyń dızaınerleri qaýymdastyǵynyń» prezıdenti Nurjamal Nurpeıisova tapsyrystyń qalaı túskenin jáne oryndalýy týraly aıtty, dep habarlaıdy Qamshy.kz aqparat agenttigi QazAqparattyń deregine súıenip.

Aqtaý qalasyndaǵy Nazarbaev Zıatkerlik mektebiniń oqýshylarymen kezdesken dızaıner alǵash tapsyrys týraly estigende abdyrap qalyp, tipti senbegenin jetkizdi.

«Men tapsyrys túskende Reseıde saparda boldym. Elge oralǵanymda maǵan Ronaldýǵa shapan tigý týraly usynys tústi. Men alǵashynda túsinbeı qaldym, ne, ne dep suraı berippin. Tańǵalǵanym sonshalyq, áriptesterimnen basqa bireýmen shatastyryp turǵan shyǵar dep suradym. Adam sengisiz ǵoı. Qatelesken bolar dep oıladym. Áriptesterim de áıgili Ronaldý ekenin aıtýda. Dereý tapsyrys bergen mekememen baılanysqa shyqtym», - deıdi Nurjamal Nurpeıisova.

Dızaınerdiń sózine qaraǵanda, tapsyrys berýshiler aldymen shapannyń eskızin suratqan. Sondyqtan dızaıner lezde iske kirisip, eskız salatyn jergilikti jáne Reseıdegi sýretshilerimen baılanysqa shyǵady. Úzdigin tańdap, kóńilinen shyqqan ulttyq kıimniń 10 túrli syzbasyn tapsyrys berýshilerge joldaıdy. Al, olardyń basty talaby - shapannyń artynda Qazaqstannyń týynda beınelengen kún men qyrannyń bolýy.

«Biz ony oryndadyq. Sonyń ishinde unaǵan eskızdi mekeme tańdap aldy. Tipti, Krıshtıaný Ronaldýdyń bapkerine de shapan kıgizdik. Ol da meniń sán úıimnen shyqqan dúnıe»,-deıdi dızaıner.  Sán úıiniń ujymy tapsyrysty eki aı boıy tigipti. Osy ýaqytta Mańǵystaýdyń bas dızaıneri bar ýaqytyn tapsyrystyń sátti shyǵýyna bólgen. Ásirese, shapanǵa qajet  zattardy ózi izdep, tipti tigilýin jiti qadaǵalaǵan. Sondyqtan bul tapsyrystyń asa erekshe ekenin aıtady. Krıshtıanýǵa shapandy tapsyrǵan sátte dızaıner Dýbaıda bolypty.  

«Men Dýbaıda júrgende foto jiberdi. Sodan keıin ǵana men ınstagramdaǵy paraqshama saldym. Barlyǵy meni quttyqtap jatty. Bul biz úshin úlken mártebe, maqtanysh. Men ony erekshe jaqsy kóremin.  Óziniń eńbegimen óziniń bolashaǵyn qalyptastyrǵan jan. Onyń fýtbol oınaýdaǵy tehnıkasy keremet», - dep aıaqtady sózin Nurjamal Nurpeıisova.