Qazaqstan Respýblıkasy Din isteri jáne azamattyq qoǵam mınıstrligi Qazaqstan Respýblıkasy Úkimetiniń «Daryn» memlekettik jastar syılyǵyna baıqaý  jarıalaıdy. Qujattar 2018 jyldyń 1 tamyzyna deıin qabyldanady, dep jazady Qamshy.kz aqparat agenttigi QR Din isteri jáne azamattyq qoǵam mınıstrliginiń baspasóz qyzmetine silteme jasaı otyryp.

«Daryn» memlekettik jastar syılyǵy -  ǵylym, shyǵarmashylyq, qoǵamdyq qyzmet salalarynda jemisti eńbegimen kózge túsken, sondaı-aq joǵary sporttyq jetistikteri úshin daryndy jastardy memleket tarapynan qoldaý maqsatynda jyl saıyn usynylady.

Baıqaý -  estrada, klasıkalyq mýzyka, halyq shyǵarmashylyǵy, ádebıet, teatr jáne kıno, jýrnalısıka jáne qoǵamdyq qyzmet, sport, dızaın jáne beıneleý óneri, ǵylym  nomınasıalary boıynsha ótedi.  

Halyqaralyq jáne respýblıkalyq konkýrstardyń, festıváldar  men túrli sharalardyń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary, sondaı-aq qyzmeti ınovasıalyq bolyp tabylatyn jáne tıisti sala men tutastaı qoǵamdy damytýǵa yqpal etken  Qazaqstan Respýblıkasynyń  29 jasqa deıingi azamattary syılyq alýǵa úmitker bola alady.

«Daryn» jastar syılyǵyn alýǵa kandıdatýralardy usynýdy ortalyq, jergilikti jáne ózge de memlekettik organdar, qoǵamdyq birlestikter men Qazaqstan Respýblıkasynyń zańnamasynda belgilengen tártippen tirkelgen ózge de zańdy tulǵalardyń ókilderi júrgizedi.

Barlyq jeńimpazdarǵa Qazaqstan Respýblıkasy Úkimetiniń qaýlysymen «2017 jylǵy Daryn memlekettik jastar syılyǵynyń laýreaty» ataǵy beriledi, jáne olar  dıplommen, tósbelgilermen jáne aqshalaı syılyqtarmen marapattalady.

Tolyq aqparatty QR Din isteri jáne azamattyq qoǵam mınıstrliginiń resmı saıtynan alýǵa bolady.

Esterińizge sala keteıik, «Daryn» jastar  syılyǵy Memleket basshysynyń bastamasymen 1992 jyly taǵaıyndalǵan bolatyn.  Ár jyldary Baqtıar Artaev, Serik Sápıev, Ilá Ilın, Denıs Ten, Dımash Qudaıbergenov, Marıa Mýdrák, «Mýz ART» toby, Qalqaman Sarın jáne basqada azamattar atalǵan syılyqty ıelengen bolatyn. 2017 jyldan bastap Qazaqstan Respýblıkasynyń Din isteri jáne azamattyq qoǵam mınıstrliginiń bastamasy boıynsha «Daryn» syılyǵy  jyl saıyn tabystalýda.