Jezqazǵan qalasynda kóp qabatty eki turǵyn úıdiń qurylysy bastaldy, dep habarlaıdy Qamshy.kz aqparat agenttigi.

Jezqazǵan qalasynda «Nurly jer» baǵdarlamasymen eki kóp qabatty turǵyn úıdiń qurylysy bastaldy. Sátbaev kóshesinde salynǵaly jatqan 4 qabatty, 36 páterli úıdiń qurylysyna 307,6 mıllıon teńge qarastyrylǵan. Onyń 276,9 mıllıon teńgesi respýblıkalyq, 30,8 mıllıony oblystyq búdjetten bólinip otyr. Qurylys aıaqtalǵan soń, atalǵan úı baspana kezeginde turǵan turǵyndarǵa arendalyq baspana retinde beriletin bolady.

Memlekettik baǵdarlamamen Gagarın kóshesinde boı kóteretin kelesi 5 qabatty, 30 páterli úıdiń qurylysyna oblystyq búdjetten 274,4 mıllıon teńge bólingen. Bul úıdi «Turǵyn úı qurylysy jınaq banki» salymshylary ala alady. Eki nysanda da qurylys júrgizýshi bas merdiger – «Astra Servıs plús» JSHS.

-Bul úılerdiń qurylysyna qarajat jetkilikti deńgeıde bólinip otyr. Búginde qajetti prosedýralardyń barlyǵy óz retimen júrip jatyr. Qurylysqa qajet mamandar jumyspen qamtý ortalyǵynda jumyssyzdar tiziminde turǵan azamattar qatarynan alynatyn bolady. Eń bastysy qurylysty belgilengen merzimde aıaqtap, baspanaǵa muqtaj turǵyndarǵa tapsyrý, - deıdi qurylys alańyna baryp, ondaǵy jumys barysymen tanysqan Jezqazǵan qalasynyń ákimi Batyrlan Ahmetov.

Jospar boıynsha atalǵan úılerdiń qurylysy bıyl jeltoqsan aıynda aıaqtalmaq.

Darhan Muqanov