Bul týraly Óńirlik komýnıkasıalar ortalyǵynda ótken baspasóz máslıhatynda Almaty oblysy Kásipkerler palatasynyń kásipkerlikke qarjylyq emes qoldaý kórsetý bóliminiń basshysy Erlan Datqaev málimdedi.

Aıtýynsha, «Bastaý Bıznes» jobasy 2017-2021 jyldarǵa arnalǵan Nátıjeli jumyspen qamtý jáne jappaı kásipkerlikti damytý baǵdarlamasy aıasynda júzege asyrylady. Ótken jyly oqytý pılottyq rejımde oblystyń jeti aýdanynda ótkizildi. Kýrsqa 1 312 adam qatysyp, onyń 285 qatysýshysy óz isin ashyp, jobalary jalpy somasy 1 mlrd teńgeden astam qarjyǵa qarjylandyryldy. Bıznes-jobalar san túrli: mal jáne ósimdik sharýashylyǵynan bastap, óndiris pen qyzmet kórsetý salasyna deıin qamtydy. Sonymen birge, óńirge shaǵyn nesıelendirýge 4,3 mlrd teńge bólingeni belgili boldy.

«2018 jyly «Bastaý Bıznes» jobasy barlyq aýdan ortalyqtarynda, sondaı-aq, Taldyqorǵan, Tekeli, Qapshaǵaı qalalarynda uıymdastyrylady. Bıyl 3,3 myń adamdy oqytyp, 600-den astam jobany qarjylandyrýdy josparlap otyrmyz», -  dedi Almaty oblysy Kásipkerler palatasynyń kásipkerlikke qarjylyq emes qoldaý kórsetý bóliminiń basshysy Erlan Datqaev.

Spıkerdiń sózinshe, «Bastaý Bızneske» jumyssyzdar men ózin-ózi qamtyǵan azamattar jáne isin keńeıtýge maqsat qoıǵan jumys istep júrgen kásipkerler de qatysa alady.

Qatysýǵa ótinim Jumyspen qamtý ortalyǵy arqyly qabyldanady jáne úmitkerler onlaın testileýden ótedi. Onyń nátıjesi boıynsha oqýǵa qabyldanady. Oblys boıynsha testileý 14 sáýirge josparlanǵan.

Oqytý baǵdarlamasy 12 modýlden turady. Qatysýshylarǵa salyq rejımderi, zańnama, marketıń negizderi, bıznes salasyndaǵy suranystaǵy baǵyttar jáne t.b. bilim beriledi. Sonymen birge, tájirıbelik sabaqtar, kásipkerlik obektilerin aralaý, tabysty bıznes ókilderimen kezdesý uıymdastyrylady. Bir aılyq kýrsta sabaqty otandyq bıznes-trenerler  beretin bolady.

Oqý aıaqtalǵan soń, «Bastaý Bıznes» qatysýshylary 6%-pen 18 mln teńgege deıin shaǵyn nesıege qol jetkize alady.

Jalpy Almaty oblysynda «Bastaý Bıznes» jobasy boıynsha oqytý16 sáýir kúni bastalady.