Aqmola oblysynda 58 adamnyń astan ýlaný sebebi anyqtaldy, dep habarlaıdy Qamshy.kz aqparat agenttigi Aqmola oblystyq Qoǵamdyq densaýlyq saqtaý departamentiniń baspasóz qyzmetine silteme jasap.

Eske sala keteıik, keleńsiz oqıǵa aǵymdaǵy jyldyń naýryz aıynda Shortandy kentindegi «Lastochka» dámhanasynda bolǵan. Janaza asyna barǵan adamdardyń alǵashynda 44-i ózderin jaısyz sezinip, dárigerdiń kómegine júgingen edi. Keıin jaǵdaıy nasharlaǵandar sany 58-ge jetti. Naýqastardyń barlyǵy ishteri júrip, qusý, dene qyzýynyń kóterilýi belgilerine shaǵymdandy. Dárigerler olarǵa birden jedel medısınalyq kómek kórsetti.

Osyǵan oraı, dámhanadaǵy as máziriniń barlyǵynan zerthanalyq synama alynyp, saraptamadan ótkizilgen bolatyn. Aqmola oblystyq Qoǵamdyq densaýlyq saqtaý departamenti mamandarynyń deregi boıynsha, zerthanalyq zertteýlerdiń negizinde barlyq aýyrǵan adamdarǵa «Salmonellez» túpkilikti dıagnozy qoıyldy. Naýqastarǵa kajetti medısınalyq kómek kórsetilip, úı oshaqtarynda keshendi túrde epıdemıaǵa qarsy jáne profılaktıkalyq is sharalar ótkizildi.

«Et antısanıtarlyq jaǵdaıda daıyndalǵan, jeke gıgıenany saqtaý úshin jaǵdaı jasalmaǵan, eshkim turmaıtyn, jaısyz úıde pisirilip, kesilgeni tekseris barysynda anyqtaldy», dedi departamenttiń baspasóz qyzmetinen.

Sonymen qatar, mamandar týralǵan et jáne azyq-túlik belgisiz avtokólikpen jetkizilip, «Lastochka» dámhanasyna bólme temperatýrasynda 10 saǵattan artyq arnaıy ydysta saqtalynǵanyn anyqtap otyr.

«Etti pisirýge jáne týraýǵa týystary qatysqan, bakterıologıalyq zertteý kezinde, tamaq daıyndaýǵa qatysqan bir áıelde salmonella anyqtalǵan, ıaǵnı ol saý juqtyrýshy bolyp tabylady. «Lastochka» dámhanasynda júrgizilgen jospardan tys tekserý kezinde sanıtarlyq - gıgıenalyq talaptarda birqatar zańbuzýshylyqtar anyqtalǵan. Osy fakti boıynsha derekter Shortandy AİİB-ne ákimshilik zańnamaǵa sáıkes, óz quzyreti sheginde sharalar qabyldaý úshin jiberildi. «Oǵan qosa, aldaǵy ýaqytta jappaı tamaqtan ýlaný oqıǵalaryna jol bermeý maqsatynda «Atameken» kásipkerler palatasymen birlesip qoǵamdyq tamaqtandyrý qyzmetterin kórsetetin kásipkerlermen túsindirý jumystary jandandyryldy», dep túsindirdi departamentiń baspasóz qyzmeti.