Shynynda, Aqtóbege qobaljyp baryp edim, qoıan qýǵandaı, qýanyp qaıttym. Qobaljyǵanym, «Apyrmaı, keshim qalaı ótedi eken? Kórermender az jınalyp qalsa she?» degen jybyrlaýyq suraqtar sanamda «syrǵanaq teýip» júrdi. Ony jasyrmaımyn. 

Hosh, sonymen Kúlki kúni Aqtóbedegi óner ortalyǵynda alpys jyldyǵyma baılanysty shyǵarmashylyq keshime jınalǵandarda esep bolmady. Qýanǵanym sonshalyq, qulaǵymdy qası berippin. Onyń ústine, kúlki keshi jańa formatta ótti, ıaǵnı men sahna tórinde bazbireýlerdeı tanaýymdy kóterip otyrǵan joqpyn, kórermenderimniń arasynda arqa–jarqa bolyp otyrdym. Eń sońynda ǵana tilek aıtýym úshin sahnaǵa shaqyrdy. Meniń týylǵan kúnimnen bastap, láńgi teýip júrgen bala Muhtardyń bir kúndik sátteri, stýdenttik jyldardaǵy qyzyqty oqıǵalar, taǵy sondaılar kesh aıaqtalǵansha qysqa, ári nusqa kúıinde sahnalanyp, odan keıin ǵana satıralarym oryndalyp jatty. «Eki ezý» teatrynyń ártisteri Bekbol, Berik, Gúlzat, Tańsholpandar kórermenderiniń eki ezýlerin jıdyrmady. Kesh «Kúleıikshi, Muhtar–aı!» dep ataldy.

Árıne, keshti uıymdastyrýshy «Eki Ezý» satıra teatrynyń ujymyna alǵysym sheksiz! Onyń jetekshisi, belgili satırık, shákirtim Nurlybek Jubatqan: «Aǵa, Shymkentten buryn biz toılaıyqshy?» degen usynysy uıyqtatpaǵan edi, er jigitke tán ýádesinde turdy. Allanyń nury jaýsyn inime! Oblys ákimi Berdibek Saparbaevtyń qoldaýy da tóbemdi kókke jetkizdi. Áleýmettik jelide «Nege shymkenttikter shyrt uıqyda jatyr? Álde, umytyp ketken be?» dep janashyrlyqpen jazyp jatqan oqyrmandaryma aıtarym: «Shyn satırık nemese aqyn belgili bir aýmaqtyń ǵana basybaıly jazýshysy bolmaıdy. Shynaıy jazýshy respýblıka jurtshylyǵyna ortaq. Onyń ústine men 1957 jyly 12 jeltoqsanda týylǵanmyn. Qaqaǵan qysta. Jyldyń sońy. Demek, keler jyldan da úlesim bar, jyl boıy toılaýyma sizderden ruhsat.» Áleýmettik jelidegi «Jer satylyp jatqanda toılaǵany nesi?» degen syqpyttaǵy oqyrman jazbalaryna da kúle qaraımyn. Jerdiń satylýyna bir kisideı men de qarsymyn. Biraq ómir munymen toqtap qalǵan joq qoı? Já, jaraıdy, sózdiń reti kelip jatqan soń aıtyp jatqanym ǵoı, meni jan–jaqtan quttyqtap kelýshiler kóp boldy. Qyrǵyzstan Respýblıkasynyń ártisi Abdy Kadyrmatov (Jonyshbaı), «Tamasha» oıyn- saýyq otaýynyń tarlany Baqyt Aıtova hanymnyń arnaıy quttyqtaǵandary júregimdi jylytty...