Qazaqstan Respýblıkasy Parlamentiniń Senaty, Áleýmettik-mádenı damý jáne ǵylym komıtetiniń múshesi Baqytjan Jumaǵulov N. Nazarbaevtyń «Prezıdenttiń bes áleýmettik bastamasy» atty halyqqa Úndeýi aıasynda T. Júrgenov atyndaǵy Qazaq Ulttyq óner akademıasynyń shyǵarmashylyq ujymymen júzdesýge arnaıy qonaqqa keldi.
Kezdesýdiń alǵy sózin atalmysh akademıanyń rektory, profesor Bıbigúl Núsipjanova ashyp, senat depýtatyna óner shańyraǵynda sońǵy ýaqytta bolyp jatqan jańalyqtarmen tanystyrdy. Rektor Senat depýtatynyń bıik bedeliniń aıǵaǵy retinde taǵaıyndalǵan memlekettik dárejelerimen tanystyrǵan sátte: «Reseılik matematık-ǵalym Sadovnıchıı aıtqandaı, munyń bárin aıtpaı-aq qoıýǵa bolar edi, alaıda munyń barlyǵy da shyndyq», - dep kópshilikti bir kúldirip aldy.
Senat áńgimesin jastyq shaǵynyń qyzyqty kúnderiniń kýási ǵımarattyń árbir oryndaryn saǵynyshpen eske ala otyryp, Elbasynyń joǵary oqý oryndaryndaǵy áleýmettik bastamalardy talqylady.
«Prezıdenttiń bes áleýmettik bastamasy» atty halyqqa Úndeýiniń orny zor. Qazaq danalyǵy aıtady: «Jaqsy isti kórgende jetýge asyq». Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý jáne t.b. jastardyń áleýmettik maqsattaǵy ıgi maqsattaryna baǵyttalyp otyr. Aldaǵy oqý jylynda jas talapkerlerdiń bolashaǵy jarqyn bolýyna 20 myń oqý granty bólinip, bilimdi alamyn degen jastarǵa dańǵyl jol ashylyp otyrǵannyń aıǵaǵy», - dedi.
Sondaı-aq, sońǵy jyldary elimizde jastar Reseı sıaqty jaqyn jáne alys shet memleketterge bilim izdep ketýshilerdiń sany artyp otyr. Bul másele oń sheshimin tabý úshin elimizdegi bilim berý sapasyn jaqsy jolǵa qoıý kerektigin aıryqsha atap aıtty. Shyǵarmashylyq ujymy depýtatqa «shet memleketterde bilim alyp jatqan jastardyń sany kúnnen kúnge artýda. Munyń elimizdiń áleýmettik-mádenı baǵytyna keri áseri bolýy múmkin be?» degen júrekjardy oılaryn ortaǵa saldy.
«Shet elde bilim alýdyń jaqsy ne jaman ekenin biz qazir naqty eshteńe aıta almaımyz. Bul úderistiń qandaı nátıje beretinin tek on ne on bes jyldan keıin ǵana baıqaı alamyz. Osyndaı máselelerdi sheshý úshin Elbasynyń Úndeýinde aıtylǵan álemdik standarttarǵa saı bilim berý júıesin qalyptastyra otyryp, stýdentterdiń bilim alýyna jáne turatyn jerine jaǵdaı jasaýǵa tıisti nazar aýdarýymyz qajet», - dep aıryqsha atap aıtty senator.
Baqytjan Tursynuly Elbasynyń qashanda jastarǵa úlken úmit artatynyn aıta kelip, máńgilik ult ıdeıasynyń negizgi ózegi – qazaq ónerin álemge pash etetin jas óner ıelerine úlken úles qosatyndaryna senimin bildirdi. Kezdesý barysynda: «Teatr óneri fakúltetiniń dekany, profesor Aman Qulbaev tarıhy baı kıeli shańyraqta talaı qazaq óneriniń tarlandary túlep ushty.
Qazirgi oqý teatrynyń oryndary óte az bolǵandyqtan keń ári búgingi zaman talabyna saı Akademıa aýlasynda jańa zamanaýı úlgide teatr qajet bolyp otyr. Tipti bul qurylystyń jobasy da daıyn tur, ıek qana qolǵa alyp kirisý kerek. Akademıanyń shyǵarmashylyq kórsetkishteri úlken bıiktikke shyǵý úshin eń aldymen jańa oqý teatry asa qajet bolyp otyr», - dep óz saýalyn joldady.
Ǵylym jáne bilim salasynda basshylyq etken Halyq qalaýlysy elimizdegi joǵary oqý oryndaryndaǵy túıtkildi máseleler tóńiregindegi saýaldarǵa taldap-talǵap, tolyqqandy jaýap berdi.
