Qazaqstan shveısarlyq bankte jatqan bir mıllıon dollardan astam elden zańsyz shyǵarylǵan qarajatty tárkileý boıynsha qajetti is-sharalardy qolǵa aldy, dep habarlaıdy Qamshy.kz aqparat agenttigi Bas prokýratýranyń baspasóz qyzmetine silteme jasaı otyryp. Bul qarajatty halyqaralyq izdeýde júrgen Maǵzum Abdarlıev shetelge shyǵarǵan.

Bas prokýratýra qylmystyq jolmen kelgen jáne elden tysqary jerge zańsyz shyǵarylǵan múlikti qaıtarý boıynsha jumys nátıjesinde «RothschildBankZurich» shveısarlyq bankten 1,3 mıllıonnan astam AQSH dollary kólemindegi aqshalaı qarajatty anyqtady. 

Belgili bolǵandaı, aqsha Maǵzum Abdralıevke tıesili, ol 2012 jyldan bastap halyqaralyq izdeýde júr. Abdralıev «Qorǵas isi» boıynsha qylmystyq toptyń músheleri Jaqaevqa, Ábdirahmanovqa jáne Qurmanalıevke shet elde  qarajatty zańdastyrýǵa kómekteskeni úshin kúdikti boldy.

«Osyǵan baılanysty, prokýror shveısarlyq banktegi aqshalaı qarajatty tárkileý týraly ótinishhatty sotqa joldady. Bıylǵy jyldyń 29 naýryzynda Almaty qalasynyń Almaly aýdandyq soty prokýrordyń ótinishin qanaǵattandyrdy», — delingen habarlamada. 

Odan basqa, atalǵan qylmystyq is boıynsha sotqa deıingi tergep-tekserý barysynda «TAT Kredıt»  JSHS-nyń keńsesin tintý kezinde Abdralıevke tıesili 762 myń AQSH dollary jáne 915 myń teńge tabyldy. Prokýratýra qarajatty tárkileý úshin sotqa tıisti ótinish joldady.

Nátıjesinde prokýratýra organdarynyń bastamasy boıynsha 2,1 mıllıonnan astam AQSH dollary memlekettiń paıdasyna tárkilendi.

Baspasóz qyzmeti atap ótkendeı, qylmystyq-prosestik zańnamaǵa ózgeristerdiń engizilýine baılanysty bıyldan bastap úkim shyqqanǵa deıin zańsyz jolmen alynǵan múlik tárkileýge jatady.