Keshe «Ámire» fılminiń jabyq kórsetilimi ótti. Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jáne Álıdar Ótemuratovtyń «Dar Play» kompanıasymen birlese túsirgen fılm Qazaqstan tarıhynda esimi altyn áriptermen jazylǵan Ámire Qashaýbaevtyń Fransıa astanasy Parıjde ótken EKSPO kórmesinde án salyp, tórtkil dúnıeni tańdaı qaqtyrǵany, Fransıada bastan ótkergeni, kúmis kómeı ánshiler dodaǵa túsken báıgege qatysqany baıandalady.
Ámire Qashaýbaev Fransıada Alash ıdeıalary men murattary aıasynda qanattanǵan, qazaq, ózbek jáne basqa da túrki halyqtarynyń ulttyq bostandyǵy úshin kúresiniń strategıasy men taktıkasyn aıqyndaǵan qaıratker Mustafa Shoqaımen kezdesýi, onyń týǵan jerge degen saǵynyshy men qazaq baýyrlarynyń bir-birine degen qoldaýy sýretteledi.
«Ámire» kórkem fılmin Qazaqstan men AQSH birlesip aǵylshyn tilinde túsirgen. Ol qazaq jáne orys tiline dýblájdalǵan.
Ámire Qashaýbaevtyń daýysyn Serjan Musaıyn dýblájdady.
Atalmysh fılmniń tusaýkeserinde fılm eki zalda eki tilde kórsetildi. Ámire Qashaýbaevtyń rólin akter Sanjar Mádıev somdady. Onyń aıtýynsha, «Ámire» fılmi qazirshi ýaqyttaǵy eń qıyn ári jaýapkershiligi mol jobalardyń biri boldy. Tarıhı tulǵanyń obrazany enip, qalyń kórermenniń júregine jetkizý úshin baryn salǵanyn aıtady. Akter dombyrada oınaý ónerin tereń meńgerý úshin dombyrashy Nurjan Tájikenovten dáris alǵan. Vokalǵa qatysqan.
BAQ ókilderi qatysqan fılmniń jabyq kórsetiliminde Mustafa Shoqaıdyń rólin somdaǵan Erkebulan Daıyrovtyń akterlik sheberligi kóbiniń oıynan shyqty.
Fılmde basty rólderdiń birin aýstralıalyq aktrısa Ebbı Kornısh somdady.
«Ámire» fılmi kórsetilgennen keıin baspasóz otyrysy ótti. Oǵan Mádenıet jáne sport mınıstri Arystanbek Muhamedıuly, fılmniń rejıseri Djef Vespa (AQSH), bas prodúser Álıdar Ótemuratov jáne onyń keńesshisi Jarqyn Shákárim, (Ámire Qashaýbaevtyń ómiri men shyǵarmashylyǵyna arnalǵan eńbekterdiń avtory), Ámire Qashaýbaevtyń rólin somdaǵan akter Sanjar Mádıev jáne Mustafa Shokaıdyń rólin somdaǵan akter Erkebulan Daıyrov qatysty.
Basapasóz otyrysynda sóz alǵan Arystanbek Muhamedıulynyń aıtýynsha fılm 2016 jyly kórermenege jol tartýy qajet edi.
- Biz 2016-2017 jyly EKSPO-ǵa qarsańynda «Ámire» fılmin shyǵarýdy josparlaǵan edik. Sebebi, Ámire Fransıaǵa EKSPO-ǵa barǵan. Bizdiń maqsatymyz - EKSPO kezinde osy kórkem fılmdi shyǵarý bolǵan. 2015-2016 jyldary ekonomıkalyq turǵyda kóptegen qıynshylyqtar bolǵannan keıin, josparlaǵan ýaqyttan keshteý shyqty, dep túsindirdi mınıstr.
«Ámire» fılminiń bas prodúseri Álıdar Ótemuratovtyń aıtýynsha fılmge mıllıard eki júz myń teńge ketti.
Arystanbek Muhamedıuly bir jarym saǵattyq fılmge Ámireniń barlyq ómirin syıdyrý múmkin bolmaǵanyn aıtady. Bolashaqta jalǵasy túsirilý múmkin ekenin de aıtty.
"Ámire" fılmi 5 sáýirden bastan elimizdiń barlyq kınoteatrlarynda kórsetiledi.
