Ońtústik Qazaqstan oblysynda 2018-2025 jyldarǵa arnalǵan áleýmettik-ekonomıkalyq damý tujyrymdamasy talqylandy. Oblys ákimi Janseıit Túımebaevtyń tóraǵalyǵymen ótken alqaly jıynda Túrkistan qalasynyń ákimi Tájibek Musaev qalanyń damý kopsepsıasymen tanystyrdy, dep habarlaıdy QazAqparat.
Qala ákiminiń sózinshe, Túrkistanda bıyl jalpy óńirlik ónim kólemi 125 524,8 mln teńgeni qurap, 7 paıyzǵa arttyrý josparlanýda. Al, 2025 jylǵa bul kórsetkishti 227 825,5 mln teńgege jetkizý kózdelip otyr.
«Turan jerinde týrızmdi damytý úshin 2018 jyly 3 juldyzdy qonaq úı, 2000 adamǵa túrli qyzmet kórsetý múmkindigi bar «Mega city» oıyn-saýyq kesheni men 100 adamǵa arnalǵan Sport saýyqtyrý keshenin iske asyrý kózdelýde. Qala turǵyndaryn taza aýyz sýmen qamtamasyz etý boıynsha bıyl jalpy 5 nysannyń qurylysyna 821,6 mln teńge bólinip, 2018-2019 jyldary paıdalanýǵa beriledi. 2025 jylǵa deıin Túrkistan qalasynda jáne eldi mekenderde halyqtyń tabıǵı gazben qamtamasyz etý kórsetkishi 99,9 paıyzǵa jetkizý josparlanyp otyr», - dedi Tájibek Musaev.
Ákim sondaı-aq turǵyn úı salasynda bıylǵy jyly 20 kópqabatty turǵyn úıdiń qurylysy júrgiziletinin jetkizdi. Onyń aıtýynsha, 2019-2025 jyldar aralyǵynda Túrkistan qalasynda búdjet esebinen jalpy 280 myń sharshy metr arendalyq turǵyn úı salynyp, 4 800 otbasyǵa paıdalanýǵa beriletin bolady. Al, Kentaý qalasynyń 2018-2025 jyldarǵa arnalǵan damý konsepsıasyn tanystyrǵan qala ákimi Ábdibaqyt Maqulbaev shahardyń damý konsepsıasy 4 baǵytta iske asyrylatyn aıtty.
«Áýelgi baǵyt - ónerkásip salasyn damytý, shaǵyn jáne orta kásipkerlikti ilgeriletý, sondaı-aq aýyl sharýashylyǵy salasy jáne áleýmettik nysandardyń jáne ınjenerlik ınfraqurylymdardy jańǵyrtý. Máselen, Kentaýda jalpy 2018-2025 jyldary ónerkásip salasynda jobalyq quny 55,5 mlrd teńgeni quraıtyn 9 ınvestısıalyq jobany iske asyrý kózdelýde. 2018 jyly shaǵyn orta bıznes salasynda 760,0 mln teńgege 151 joba qarjylandyrylyp, 265 adam jumyspen qamtylatyn bolady», - dedi Ábdibaqyt Tillábaıuly.
Qala ákiminiń málimdeýinshe, jyl sońyna deıin qala jáne aýyl halqy tolyq ortalyqtandyrylǵan taza sýmen qamtylatyn bolady. Tabıǵı gazben qamtasyz etý úshin 2018 jyldan bastap ishki oram júıeleriniń qurylysy júrgizilip, 2021 jylǵa deıin qala jáne aýyl turǵyndary 100 paıyz tabıǵı gazben qamtý josparlanýda.
«Óńirlerdi damytý - 2020» jáne «Nurly jer» memlekettik baǵdarlamalary aıasynda 2018-2025 jyldary bir tıptik úlgidegi 5-qabatty 60 páterli 37 turǵyn úıdiń qurylysyn júrgizilip, turǵyn úıge muqtaj, kezekte turǵan 2 220 otbasy komýnaldyq turǵyn úımen qamtylady.
Túrkistan, Kentaý qalalarynyń damý kopsepsıasyn tyńdaǵan oblys ákimi qala ákimderine jobany naqty júzege asyrý úshin ále de zerttep, zerdeleý jumystaryn tapsyrdy.
