Dúısenbi kúni Aýǵanstanda qandy oqıǵa oryn aldy, dep jazady Qamshy.kz aqparat agenttigi golosislama.com saıtyna silteme jasaı otyryp.

Qundyz aılaǵynda deni balalardan turatyn 200-ge jýyq adam jınalǵan bolatyn. Jasóspirimder men balalar Qurandy jattap, soǵan baılanysty merkelik sharaǵa attanbaq bolǵan.

Kýágerlerdiń aıtýynsha, kenetten medresege áskerı tikushaqpen kelgen adamdar oq jaýdyra bastaǵan. Shabýyldyń nátıjesinde 80ge jýyq adam oqqa ushypty, onyń kópshiligi kishkentaı balalar eken. Sonymen qatar taǵy da birneshe adam aýyr jaraqattanyp, jergilikti aýrýhanaǵa jetkizilgen.

Derekterde kórsetilgendeı, shabýyldy AQSH-tyń qoldaýymen Aýǵanstannyń áskerı áýe kúshteri jasaǵan. Aýǵanstan VVS basshylyǵynyń málimdeýinshe, shabýyl jasaýshylardyń negizgi nysany – «Talıban» terorıstik toby bolǵan. Aıtýynsha, «Talıban» sodyrlary merekelik shara qarsańynda Qundyz aılaǵynda bolǵan eken.

Áleýmettik jelilerde sol kúni qaza tapqan Quran-Hafız balalardyń sýretteri kóptep taralyp ketken.

Qandy qyrǵynnyń saldarynan eki balasynan aıyrylǵan ana: «Meniń eki ulym da Qurandy jatqa oqyp edi, keıin marapattaý kúni men chalma baılaý rásimin kútip júrgen edik. Sol kúni olar eki býma gúl alyp kelip, merekelik sharadan kelgennen soń taǵamyz dep júrgen. Gúlderdi qolyma alyp, olardy kútip otyrdym. Balalarym keshigip ketti. Kenetten adamdar shýlap, aıqaılaı bastady. Olardyń daýystary búkil aýdandy alyp ketti. Bir kezde eki balamnyń máıitin kóterip, ákesi keldi de: «Bizdiń balalarymyz Qurandy jattap aldy da, jan tásilim etti...» - dedi», - dep bolǵan oqıǵany aıtyp berdi.