Aqtóbede jańa aýdandarǵa beriletin Astana men Almaty ataýyna jergilikti halyq qarsy shyqty. Turǵyndardyń sózinshe, qala ákimdigi janynan qurylǵan komısıa qoǵamnyń pikirimen sanaspaı, ózderi bılep-tóstep jatqan kórinedi. Osy óńirge qatysty jergilikti jer-sý attaryn elemeı, jańa aýdandy Astana men Almaty dep ataımyz dep alashapqyn bolǵan shendilerdiń áreketi úlken daýǵa ulasty. Ashynǵan aqtóbelikter endi qol jınap, Prezıdenttiń atyna ashyqhat daıyndap jatyr. Bul týraly Qamshy.kz aqparat agenttigi Eýrazıa birinshi arnasynyń deregin negizge alyp habarlaıdy.   

Aqtóbeniń eki aýdanǵa bólingeni emes onyń ataýy qoǵamda qyzý pikirtalas týdyrdy. Áliptiń artyn baqty ma, álde reti solaı boldy ma,  atqarýshi bılik kóptiń pikirin bilemiz dep jumys kúnderi qoǵamdyq tyńdaý uıymdastyrdy. Stýdentter men zeınetkerler talqylaýǵa belsendi qatysty dep aıtý qıyn. Zaldaǵylardyń tek biren-sarany eki aýdanǵa Baýyrjan Momyshuly men Raqymjan Qoshqarbaev, Ábilqaıyr han nemese Bógenbaı ataýlaryn berýdi usyndy. Al minberge kóterilgender Almaty men Astana taýyp qoıylǵan ataý dep, qoldap jatty. Alaıda, qoǵamdyq tyńdaýǵa  qatysa almaı qalǵan qarapaıym turǵyndardyń pikiri basqa.

Ákimdiktegiler túrli pikirlerdiń bolýy zańdy qubylys ekenin aıtady.  Biraq,  komısıa talqylaı kele, Almaty men Astanaǵa  toqtaýdy jón kórdi dep qysqa qaıyrdy.

«Halyqtan da kelip tústi usynys Almaty men Astana degen ataý týraly. Jumys tobynyń sheshimi boıynsha, osy eki ataýdy usyndyq» - deıdi qala ákiminiń orynbasary Kúlparshyn Aıdarhanova.

Jergilikti turǵyndar aýdannyń ataýy qalaı bolady degennen qalalyq ákimdikke usynystaryn aıtqandar bolǵan. Solardyń biri – Estaı Jaılybaı. Onyń tańdaýy Alash pen Azat ataýlaryna túsipti. Biraq, komısıanyń kóńilinen shyqpaǵan bolýy kerek, usynys eskerýsiz qalypty. 

«Ataýlardy qaıtalaýǵa qarsy adammyn. Mysaly úlken  qala Almaty, úlken qala Astana. Endi ony alyp kelip Aqtóbege telýdiń menińshe esh qajettiligi joq. Ár attyń eki tilde  birdeı atalýyna jáne onyń tarıhı tárbıelik máni bolýyna  kóńil bólinse eken deımin. Meniń ózimniń osy jerde usynyp otyrǵan atym bul – Alash pen Azat degen ataý», — deıdi qala turǵyny Estaı Jaılybaı.

Shendiler jańa eki aýdanǵa Almaty men Astana ataýlaryn berý kerek dep sanasa, kópshiliktiń tańdaýy Elek pen Sazdyǵa túsip otyr. Bul ekeýi: bireýi qalanyń ishimen, bireýi syrtynda aǵyp jatqan ózenderdiń ataýy. Alaıda sońǵy sheshimdi respýblıkalyq onomastıka komısıasy qabyldaıdy. Oǵan deıin oblystyq máslıhat depýtattary talqyǵa salýlary tıis.

Bul másele qalalyq máslıhattyń otyrysynda talqylanyp, sheshim qabyldanyp ketti. Alaıda, turǵyndar  munymen kelispeıdi. Qazir halyq Prezıdentke ashyq hat ázirlep jatyr. Onda aýdandarǵa ataý berý kezinde halyqtyń pikirin eskerýdi suraǵan.