Qaraǵandyda osydan bir aı buryn páterleri órtenip ketken segiz otbasy áli kúnge deıin dalada júr dep jazady Qamshy.kz aqparat agenttigi Eýrazıa birinshi arnasynyń deregine súıenip. Otyzdan asa adam ákimdiktiń tabyldyryǵyn ábden tozdyrǵandaryn aıtady. Búgin de shahar basshysy otyratyn ǵımaratqa basa kóktep kirip, qol ushyn berýin taǵy bir márte surady. 

Bir aıdan beri týǵan-týystaryn jaǵalap, úısiz-kúısiz júrgenderdiń búginde barar jerleri taýsylǵan. Shydamdary da ábden shegine jetipti. Óıtkeni, 8 otbasydan quralǵan bas-aıaǵy 32 adamnyń ishinde múgedek te, tipti nebári toǵyz aılyq náreste de bar. Aıtýlarynsha, kómek surap, talaı tabaldyryqty tozdyrsa da, jaýapty mekemeler qımyldaıtyn emes.

«Osy kúnge deıin salyqty da, komýnaldy qyzmetterdiń tólemin de esh keshiktirmesten ýaqytyly tólep keldik. Biraq, bizdiń basymyzǵa is túsken kezde, quzyrly organdar bizden qashyp otyr. Osy durys pa? Mundaıda memleket kómektespese, endi kimge júginemiz?» - deıdi zardap shegýshi Iýlıa Vaımn.

«Senesiz be? Bir aıdan beri dalada júrmiz. Aramyzda jasyna da tolmaǵan sábıimiz bar. Kúlge aınalǵan úıimiz 70 jyl buryn salynǵan. Eki qabattan ǵana turady. Al kórshi kóshelerde úsh qabatty, ári bertin salynǵan úıler súrilip jatyr. Aldymen, ákimdik úısizderdiń máselesin sheship bermeı me?» - deıdi zardap shegýshi Vıktorıa Ten.

Tótenshe jaǵdaı jetinshi naýryzda tún ortasynda tirkelgen.

Órt eki qabatty úıdiń shatyrynan shyqqan bolatyn. Aǵashtan salynǵan 8 páterlik eski úı ortalyq qazandyqqa qosylmaǵandyqtan, ár páterge jeke pesh ornatylǵan. Al sol túni qatty jelden murjadan shyqqan shoq shatyrǵa túsip, barlyq úıdegi dúnıe-múlik kúlge aınalǵan. Sondyqtan,  «ákimdik tym bolmasa, qujatymyzdy rásimdep berse» deıdi ashynǵan turǵyndar.

«Sátbaev qalasynda týra osyndaı jaǵdaı tirkelgen eken. Bir adam qaza taýypty. Olarǵa jańa úılerden baspana berip jatyr. Bizdiń sonda qaı jerimiz kem? Álde adamnyń qazasy kerek pe edi... Bizge záýlim úı de, jańa úı de, birneshe bólmeli páter de kerek emes!!!! Tek qujatymyzdy retke keltirip berse eken» - deıdi zardap shegýshi Svetlana Vaselkova.

Degenmen, másele óz sheshimin tabatyn túri bar. «Ákimdikten tıisti jaýap almaıynsha, bul jerden ketpeımiz» degen turǵyndarǵa sheneýnikter oń kózben qaraı bastaǵandaı. Demeýshilerdiń kómegimen, baspanasyz qalǵan jandarǵa jaqyn ýaqytta jańadan úı turǵyzylmaq.

«Qala ákimshiliginiń qabyldaýynda boldyq. Ákimdikpen de, bizdiń qormen de birigip jumys jasaıtyn boldyq. Eń aldymen dokýment jaǵyn rettep alǵannan keıin, osy úılerdi jańadan turǵyzýǵa bel býyp otyrmyz. Qalaı qujattary túgel bolady, solaı biz qurylysty bastaımyz». – deıdi demeýshi Nurjan Zákenov.

«Biz turǵyndardyń jaǵdaıyn túsinemiz. Sondyqtan árıne, qujattardy rásimdeý, tirkeý jaǵynan kómektesemiz. Sebebi, keıbiriniń qujattary múldem janyp ketken. Qazir másele aýdandyq jáne qala ákimdiginiń baqylaýynda» - deıdi Qazybek bı aýdanynyń ákimi Tatána Shatohına.

Jańa baspanany salý úshin aldymen turǵyndardyń janyp ketken qujattary rásimdelmek. Bul is oń sheshimin tapqan soń, órtengen úıdiń ornyna jańasy boı kóteredi. Ákimdik tarapy da «qujat máselesin sheshýge muryndyq bolamyz» degen ýádesin tógýde.