Ulttyq bank tóraǵasy Danıar Aqyshev qazaqstandyqtarǵa valúta naryǵyna qatysty oılanbaı sheshim qabyldamaýǵa keńes berdi, - dep habarlaıdy Tengrinews.kz.
Ulttyq Bank basshysy sońǵy kúnderi aıyrbastaý baǵamynyń aýytqyǵanyn atap ótti.
— Nátıjesinde Reseı rýbliniń álsireýi aptanyń basynan bastap shamamen 10 paıyz boldy. Reseı Federasıasy -Qazaqstannyń negizgi saýda áriptesi. Eki el Eýrazıalyq Ekonomıkalyq Odaqtyń qatysýshylary bolyp tabylady. Bul eki eldegi prosesterdiń ózara táýeldiligin bildiredi. Nátıjesinde teńge eki kún (9 jáne 10 sáýirde) ishinde 1,8 paıyzǵa álsiredi, - dep habarlady Aqyshev.
Sondaı-aq, QR Ulttyq Bankiniń tóraǵasy Qazaqstan men Reseıdiń ulttyq valútalarynyń álsireý qarqynyndaǵy aıyrma, birinshiden, Qazaqstanǵa AQSH sanksıalarynyń qoldanylmaıtynyna baılanysty ekendigin atap ótti. Ekinshiden, Aqyshevtyń aıtýynsha, Reseı rýbli teńgege áser etetin mańyzdy, biraq jalǵyz faktor emes.
— Qazaqstannyń makroekonomıkalyq kórsetkishteri turaqty. Munaıǵa baǵa bir barel úshin 70 AQSH dollaryn quraıdy. Ekonomıkalyq ósý qarqyndary joǵary. Tólem balansyndaǵy ahýal jaqsarýda. Inflásıa nysanaly dáliz sheginde. Álemdik shıkizat naryqtarynda turaqtylyq bolǵan jaǵdaıda Qazaqstan ekonomıkasy úshin táýekelder shamaly dep baǵalanady. Úshinshiden, Qazaqstan qor naryǵynyń Reseı naryǵymen salystyrǵanda ótimdiligi joǵary emes. Onyń jahandyq qarjy naryqtaryna yqpaldasýy az. Tıisinshe, Qazaqstan men Reseıdegi ahýal ár túrli, - deıdi Aqyshev.
Sonymen qatar bank tóraǵasy AQSH-tyń nemese basqa elderdiń Reseıge qatysty yqtımal áreketterinen Reseıdiń qarjy naryǵynda shıelenistiń jalǵasýy yqtımal ekendigin aıtty.
Bul qysqa merzimdi bolashaqta teńgeniń qubylmalylyǵyn saqtaýǵa aparady.
— Qazaqstannyń barynsha jaqsy makroekonomıkalyq kórsetkishterin eskere otyryp, teńgeniń qubylýy álsireý jaǵyna da, nyǵaıý jaǵyna qaraı da oryn alýy múmkin. Baǵamnyń aǵymdaǵy qubylmalylyǵynyń naryqtyq jáne psıhologıalyq sıpaty bar. Aıtarlyqtaı aýytqý kezeńinde aktıvterdi shuǵyl aýystyrý keıinnen edáýir shyǵyndarǵa aparýy múmkin, - dep qorytyndylady QR Ulttyq Bankiniń tóraǵasy.
