Almatyda Sh.Aımanov atyndaǵy «Qazaqfılm» kınostýdıasynda Qazaqstan Respýblıkasy Parlamenti Senaty Áleýmettik-mádenı damý jáne ǵylym komıtetiniń otandyq kınematografısterimen kóshpeli otyrysy ótti. Kezdesýde «Kınematografıa týraly» zań jobasy talqylandy.
İs-sharany ashqan komıtet tóraıymy Birǵanym Áıtimova: «kınematograf tárbıeleý, ıdelogıalyq qundylyqtardy dáripteýdegi basty quraldardyń biri bolyp tabylady. Qoǵamnyń ıntellektýaldy jáne mádenı damýynyń qozǵaýshy kúshi» dep belgiledi. Sondaı-aq, Birǵanym Áıtimova, senatorlardyń qazaq kınematografıasynyń búgingi jaǵdaıyn, túıitkildi máselellerin, sapasyn kóterý, ulttyq fılmderdiń básekelestigin arttyrý, aımaqtaǵy mekenderge kınokórsetilimderdiń qoljetimdi bolýyn, otandyq kınonyń shetelde moıyndalýyn zerttep jatqandaryn jetkizdi.
Tanymal rejıserler, akterler jáne prodúserler senatorlarǵa jumys barysyndaǵy erekshelikter men kıno týraly zańnyń qabyldanýynyń qajettiligin aıtty. Naqtyraq aıtar bolsaq, rejıser Rústem Ábdirash ulttyq kıno qordyń qurylyýynyń mańyzdylyǵyn, kınoprokatshy Baýyrjan Shúkenov kınematografıa salasyndaǵy quqyqtyq retteý máselesi jáne aýyl men shet aımaqtaǵy turǵyndarǵa kınonyń qoljetimdi bolýyna nazar aýdarý kerektigin aıtty. Rejıser-anımator Adaı Ábildınov anımasıalyq kınonyń tárbıe quraly retinde damýyn sóz etse, kınorejısser «Dýbláj» SHÓB jetekshisi Bolat Qalymbetov, elimizdiń kınoprokatyna túsken fılmderdi dýblájdaý mindettelgen ýaqytta, «Qazaqfılm» negizindegi dýbláj birlestiginiń zor múmkinshiligi týraly aqparat berdi.
–– Búginde «Qazaqfılm» kınostýdıasy – ulttyq brend jáne Qazaqstan kınoındýstrıasynyń qozǵaýshy kúshi. Biz – Qazaqstannyń kınematografısteri elimizdiń «Kınematografıa týraly» zańyn kútip júrgenimizge kóp boldy. Bul zań: kınematografısterdiń, kıno óndirýshilerdiń, prokatshylardyń, dıstrıbútorlardyń jumysyn rettep otyrady, kıno ındýstrıanyń ekonomıkalyq tetikteriniń damýyn qalyptastyrýǵa múmkindik beredi. Sonymen qatar salyqtyq artyqshylyqtar, kedendik jeńildikter jáne memlekettik sýbsıdıalaý mehanızmi sıaqty naryqtyq mehanızmder arqyly jaǵymdy ınvestısıalyq klımat qalyptastyrady, – dedi Sh.Aımanov atyndaǵy «Qazaqfılm» AQ Prezıdenti Baqyt Qaıyrbekov.
KSRO halyq artısi, tanymal akter Asanáli Áshimov «Qazaqfılm» kınostýdıasyna ulttyq kompanıa mártebesin qaıtarý týrasynda sóz qozǵady: «Bul kınostýdıa elimizdiń barlyq kınogerlerin biriktiretin ortaq bir shańyraq. Osy jerge bárimiz jınalyp kıno tóńireginde áńgime quramyz. Sondyqtan da kınostýdıanyń terıtorıasy tek memleketke ǵana tıesili bolyp, jeke menshikke ótpeýi tıis. Kınostýdıaǵa ulttyq kompanıa dárejesin qaıtarý kerek, - dedi A.Áshimov.
Otyrysty senator B.Áıtimova qorytyndylady. Ol búgingi kınematografıa jáne mádenıettiń, onyń ishinde áleýmettik salalardyń damýyn retteıtin zań jobasy qarastyrylǵan kezde otyrysta aıtylǵan pikirler men usynystar mindetti túrde eskeriletinin jetkizdi.
«Qazaqfılmge» kelgen depýtattar kınostýdıanyń tynys-tirshiligimen jáne onyń tehnıkalyq múmkindikterimen tanysty. Ekskýrsıa barysynda olarǵa fılmderdi jaryqqa shyǵarý úrdisiniń erekshelikteri týraly jáne Qazaqstannyń altyn qoryna engen fılmderdiń shyǵý tarıhy týraly da baıandaldy.
- Kınostýdıaǵa qazaq kınosynyń murajaıy kerek ekendigin túsindik. Óıtkeni elimizdiń mádenı qundylyqtarynyń barlyǵy osy jerde. Osy jóninde biz depýtattyq saýal joldaıtyn bolamyz, - dedi ekskýrsıa sońynda depýtat Baqytjan Jumaǵulov.
