Máskeýde ótken aptanyń sońynda terezeden qulap ketken qazaqstandyq stýdenttiń jaǵdaıy aýyr.

Tomırıs Baısafa – qazaqstandyq stılıs Janna Ahmetovanyń qyzy. Ata-anasy bolǵan oqıǵany estı sala Máskeýge ushqan. Qyzdarymen telefon arqyly sóılesýge tyrysqanymen, Tomırıstiń jaǵdaıy aýyr boldy.

«Biz Máskeýge jete sala Reseıdegi Qazaqstan elshiliginiń qyzmetkerleri kómektesti. Tomırıske ota jasaldy, qazir komada jatyr, jaǵdaıy aýyr», - dedi anasy «Vremá» basylymynyń tilshisine.

Tomırıstiń qurbysy Áıgerim Áshimovanyń aıtýynsha, elshiliktiń qoldaýymen ota tegin jasaldy. Alaıda bolashaqta qyzdyń tolyq aıyǵyp ketýi úshin aýrýhana esigin talaı qaǵary anyq. Sol sebepti Áıgerim tıisti qarajattyń jartysyn jınaý úshin qazaqstandyqtardan kómek surady.

Aıta ketsek, 13-shi sáýirde Máskeýde Halyqaralyq qatynastar ınstıtýtynyń stýdenti,  Tomırıs Baısafa tórtinshi qabattaǵy aýdıtorıanyń terezesinen qulap ketken. Týystary men dostary qyzdy bireýdiń ıterip jibergenine senimdi. Ázirge kúdikti retinde Tomırıstiń daǵystandyq dosy Magomed Kotıev tanyldy. Reseılik BAQ-tyń deregine súıensek, Tomırıs pen daǵystandyq azamattyń ursysyp turǵan sátin kórgen kýágerler bar. Derekter qyz ben jigittiń arasynda dostyqtan da jaqyn qarym-qatynastyń bolǵanyn keltirdi. Alaıda Magomed Kotıev bolǵan oqıǵaǵa qatysy joq ekenin aıtty. Jigittiń aıtýynsha, Tomırıs ekeýi aralaspaıdy, tipti tanyǵan da emes.

Qazirgi ýaqytta qazaqstandyq qyzǵa qatysty oqıǵany Reseıdegi Qazaqstan Elshiligi baqylaýyna aldy.