Sottalǵan ulttyq ekonomıka eks-mınıstri Qýandyq Bıshimbaev sot úkimine shaǵym túsirdi. Bul týraly tengrinews.kz habarlady.

QR UEM burynǵy basshysy shaǵymynda ózine qatysty úkimdi zańsyz ári negizsiz shyǵaryldy dep esepteıdi.

«Rastap bere alamyn: ózi de, biz de - advokattary apelásıalyq shaǵym túsirdik. Sot úkimimen kelispeımiz. Qýandyq Bıshimbaevty kinásiz dep esepteımiz. Sot tergeýi kezinde onyń aıyby dáleldengen joq. Sot aldy tergeý kezinde de, sot tergeýi kezinde de qylmystyq-prosestik kodekstiń talaptary óreskel buzyldy dep sanaımyz. Qorǵaný quqyǵy buzyldy. Basty dálelimiz onyń kinásizdigi jáne aıybynyń dáleldenbeýi», - dedi eks-mınıstrdiń advokaty Mádı Myrzaǵaraev.

Sonymen qatar, advokat Bıshimbaevtyń sot zalynda sóılegen sózderin de keltirip ketti.

«Bıshimbaev óz kózqarastaryn, dálelderin sot tergeýi kezinde, sózjarysta jáne sońǵy sózinde túgeldeı aıtty. Ol bul epızodtarǵa qatysy joq ekenin naqty túsindirdi. Bireý-mireýler zańdy buzǵan da shyǵar, biraq onyń qatysy joq. Onyń qandaı da bir áreketterge qatysy baryn túgeldeı joqqa shyǵaramyz», - dedi Bıshimbaevtyń advokaty.

Esterińizge sala keteıik, bıylǵy naýryzdyń 14-i Astananyń qylmystyq ister jónindegi mamandandyrylǵan aýdanaralyq soty Qýandyq Bıshimbaevty para alǵany jóninde aıypty dep tanyp, 10 jylǵa bas bostandyǵynan aıyrǵan. Al, istiń qalǵan 22 fıgýranty túrli jazaǵa kesilgen bolatyn.