Mysyrdyń «Cairo Opera House» bas konserttik sahnasynda «Rýhanı jańǵyrý» baǵdarlamasyn iske asyrý aıasynda QR Halyq ártisi Aıman Musaqojaeva jáne QazUÓÝ stýdentteriniń qatysýymen konsert ótti.

QR Halyq ártisi Aıman Musaqojaeva maestro Aıdar Torybaev basqaratyn Qazaq ulttyq óner ýnıversıtetiniń Sımfonıalyq orkestri súıemeldeýimen óner kórsetti. 

«Mysyrda bolǵan kúnderimiz oqıǵalarǵa toly boldy: búkil álemdegi jańalyqtar týraly habar beretin «ON TV» Mysyr telearnasynyń tikeleı efırine qatystyq. Mysyrdaǵy QR elshisi Arman Isaǵalıevpen birge ózimizdiń konserttik týrymyz jáne «Rýhanı jańǵyrý» mádenı jobasy týraly suhbat berdik.

Jýyrda Amman men Aleksandrıada, endi Kaırde óner kórsetip jatyrmyz, bul osy aımaqtaǵy Qazaq ulttyq óner ýnıversıtetiniń alǵashqy konsertteri. Olar úlken tabyspen ótip, kórermender tarapynan qoldaýǵa ıe boldy. «Kaır operasy» men «Aleksandrıa operasy» - bul tamasha akýstıkasy bar keremet zaldar, kórermenderdiń ystyq yqylasy sezilýde. Osyndaı tyńdarmandar aldynda óner kórsetý biz úshin úlken abyroı. Bizdiń ánshiler, jeke oryndaýshylar men orkestr konsertten keıin zalda bolǵan erekshe kúıdi sezinip, «Kaır operasynda» alǵash ret osyndaı tabysty óner kórsetýlerine óte rıza boldy.  «Kaır operasynyń» tarıhı ǵımaraty jáne Mysyrdaǵy taǵy birneshe ǵımarattar Sýes arnasynyń ashylýyna oraı salynǵanyn bilemiz... Osy teatrǵa qansha jyl ekendigin, onyń sahnasynda qandaı uly ártister óner kórsetkenin, onyń qabyrǵalary qanshama dástúrlerdi boıyńa sińirgenin elestetip kórińiz...! Árıne,  men jáne stýdentterim osy sahnada óner kórsetýge óte qýanyshty boldyq. QazUÓÝ stýdentteri umytylmas áser aldy. Mysyrmen jaqynyraq tanystyq, endi bolashaqta Kaırdiń Óner akademıasymen yntymaqtastyq týraly memorandým jáne shartqa qol qoıý josparlanýda. Óner akademıasyna Kaırdiń barlyq mádenı ınstıtýttary, atap aıtqanda teatr akademıasy, kıno akademıasy, mýzyka akademıasy, horeografıa akademıasy kiretinin atap ótemin. Bizdiń kásibı halyq ujymdarymyz Ramadan merekesi aıasynda Kaırde óner kórsetetini týraly kelisimge keldik. Bolashaqta birlesip iske asyratyn áli kóptegen jobalarymyz bar, olardyń biri – Mysyrdyń teatr festıvali, nemese Mysyr kınofestıvali, is-sharalar aıasynda stýdentter óz jumystaryn usyna alady. Aldymyzda qoıylǵan mindetter óte aýqymdy ári qyzyqty, ózimizge sáttilik tilegimiz keledi. Akademıalyq utqyrlyq baǵdarlamasy boıynsha Kaırdegi dostarymyzdy Astanaǵa shaqyrýdy josparlap otyrmyz. Árıne, Mysyrdy ár kelgen saıyn jańadan ashýǵa bolady, mysaly ejelgi zaman eskertkishteriniń 80 % saqtalǵan ǵajaıyp Lýksor qalasy, alaıda osy joly bul qalaǵa barý sáti túsken joq.  Degenmen, álemniń eń ejelgi kitaphanasy – Aleksandrıalyq kitaphanaǵa baryp qaıttyq. Osyndaı saparlar jas mýzykanttar úshin óte mańyzdy, sebebi erekshe shabyt berip, tańǵajaıyp ári sıqyrly álemniń syrlaryn ashady...» - dedi keremet óner kórsetýden keıin Aıman Musaqojaeva.

 «Qazaq halqynyń ásem áýendi mýzykasymen tanyspyn, Astanada birneshe aı boıy turdym, EXPO-2017 kórmesine de qatystym. Sol kezde qazaq mýzykasyn súısine tyńdaı bastadym. Búgin tamasha konsert boldy, umytylmas áser aldym. Sizderdiń mýzykańyzdy tamashalaýǵa múmkindik bergen qazaq halqyna alǵysym sheksiz» - dep atap ótti Mysyrdyń ónerkásip Mınıstrliginiń bas menedjeri Haitham El Mashad.  

«Búgin tamasha konsert boldy, qatysqanyma óte rızamyn. Sizdiń Prezıdentińiz Nursultan Nazarbaevqa qazaq mádenıetin búkil álemge tanytyp jatqany úshin, jáne osyndaı konsertti uıymdastyrǵany úshin Mysyrdaǵy QR elshisi Arman Isaǵalıevke úlken alǵysymdy bildirgim keledi. Meniń ata-babalarym kezinde Tarazdan Mysyrǵa qonys aýdarǵan, sondyqtan tegim «El Tarazi».  Barsha qazaqstandyqtarǵa Kaırden jalyndy sálem joldaımyn» - dedi konsert tamashalaǵan kórermenderdiń biri.

Konsert  baǵdarlamasynda qazaqtyń tanymal ulttyq shyǵarmalary, atap aıtqanda E.Rahmadıevtiń «Qudasha Dýman», «Kúı shashýy», R.Abdysagınniń  «Aftersounds of Romanticism» shyǵarmasy,     L. Hamıdıdiń «Kazaq Válsi», sondaı-aq P.Chaıkovskıı, Dj. Rossınıniń álemdik klasıkasynyń úzdik shyǵarmalary jáne t.b. oryndaldy. 

Konsertke Qazaq ulttyq óner ýnıversıtetiniń Eýrazıalyq sımfonıalyq orkestri, Skrıpkashylar ansambli, «Shabyt» dombyrashylar ansambli, QazUÓÝ oqytýshylary men stýdentteri qatysty.

Konsert Qazaqstan Respýblıkasynyń Mádenıet jáne sport mınıstrligi men Mysyrdaǵy Qazaqstan Respýblıkasynyń Elshiliginiń qoldaýymen uıymdastyryldy.