Almatydaǵy «Iýjnyı» parki jańasha túrlenbek. Demalys ornyn kiltıpansyz keıipke keltirý kerektigin qala basshysy Baýyrjan Baıbek tapsyrdy. Synnan keıin jaýapty mamandar shuǵyl túrde jıyn ótkizip, jergilikti turǵyndardyń pikirin eskerdi. Endi saıabaqtyń joly jóndelip, sý burqaqtar ornatylady. Oǵan qosa, velojolaq salynyp, stasıonarly dárethana men oryndyqtar qoıylmaq. Al búldirshinder úshin arnaıy balalar alańqaıy ashylady. Bastysy, aryq júıesi retke keltiriledi.
«Salaýatty ómir saltyn saqtaıtyn azamattar saıabaqtyń ishin de gımnastıkalyq jabdyqtar qoıýymyzdy ótindi. Al ıttermen serýenge shyǵatyndar arnaıy orynnyń bólinýin surady. Úlkender bolsa, qoqys jáshigi kóptep qoıylsa degen ótinish bildirdi. Osynyń bárin biz eskeretin bolamyz», - dedi Almaty qalasy Tabıǵı resýrstar jáne tabıǵatty paıdalanýdy retteý basqarmasynyń bólim basshysy Oljas Janyspaev.
Saıabaq Jarokov kóshesiniń shyǵysy men Hodjanov kóshesiniń soltústigine qaraı 14,2 gektar aýmaqty alyp jatyr. Qalanyń Tabıǵı resýrstar jáne tabıǵatty paıdalanýdy retteý basqarmasynyń basshysy Áset Masabaevtyń aıtýynsha, jobaǵa sáıkes saıabaqta jaryq kózderin jańartý, sýburqaqtar jasaý, oryndyqtar men qoqys jáshikterin qoıý, burynnan bar aryqtardy jańartý, sonymen qatar balalar men sport alańdaryn, velojoldar jasaý qarastyrylǵan. «Ońtústik» saıabaǵyna is-saparmen barǵan shahar basshysy:
– Munda halyqtyń barlyq toptaryna – sábıdiń arbasyn súıregen analarǵa, balalarǵa, tynyshtyqty qalaıtyn eresek jandarǵa demalý jaıly bolýy tıis. Bul jer kóńil kóteretin emes, demalatyn oryn bolý kerek. Munda asfáltty alańdardy barynsha qysqartyp, burynnan bar tóte jáne jińishke joldardy qaıta kógaldandyryp, barynsha qolaıly ári kóleńkeli keńistik jasaǵan jón. Úlken sáýlet pishindegi emes, shaǵyn lokaldi jaryq kózderin ornatý qajet. Sý ishetin fontandar, stasıonarly dárethanalar, eń bastysy, ıtterdi serýendetetin arnaıy qorshalǵan alań bolýy mindetti», – dedi Baýyrjan Baıbek.
Sondaı-aq Baýyrjan Baıbek jumys barysymen Oqýshylar saraıy mańyndaǵy saıabaqqa da den qoıýdy qadap aıtty. Ákim ońtaılandyrý barysynda, jasyl jelekke kesirin tıgizbeýi kerektigin eskertti.
