QR Aqparat jáne komýnıkasıalar mınıstri Dáýren Abaev óziniń buıryǵymen BAQ-pen ózara is-qımyl jasaý jónindegi ýákiletti tulǵa týraly úlgilik erejeni bekitti.

Atalǵan qujat «Egemen Qazaqstan» gazetinde jarıalandy. Onda baspasóz hatshysynyń nemese baspasóz qyzmetiniń maqsaty, fýnksıalary, quqyqtary men mindetteri qamtylǵan.

Buıryqta baspasóz hatshysy paıdalanýshylarǵa memlekettik organnyń quzyretine, sondaı-aq onyń qyzmetine jatatyn máseleler boıynsha anyq jáne qajetti aqparat beretini, BAQ-qa suhbattar, túsindirmeler, jarıalanymdar ázirleýge járdemdesetini, jýrnalıserdi ýaqytsha nemese turaqty akredıtteýden ótkizetini, sondaı-aq olarǵa memlekettik organnyń quzyretine jatatyn máseleler boıynsha aqparatty neǵurlym tolyq jáne keńinen taratý úshin kómekteskeni atalyp ótken.

Baspasóz hatshysy nemese baspasóz qyzmeti laýazymdy adamdardyń BAQ ókilderimen baspasóz konferensıalaryn, brıfıńterin, suhbattary men kezdesýlerin uıymdastyrady.

Sonymen qatar olar ınternet-resýrstyń qyzmetin jańǵyrtý jáne jańa tehnologıalardy engizý máseleleri boıynsha usynystardy ázirleýi tıis. Munymen qosa, baspasóz hatshylary aqparattardy paıdalanýshylardan kelip túsetin saýaldarǵa ýaqtyly jaýaptar daıyndaýy qajet. Sonymen qatar baspasóz hatshysy paıdalanýshylardan kelip túsken saýaldarǵa jaýap berý úshin qajetti aqparatty qurylymdyq bólimshelerden suratýǵa, ınternet-resýrstyń qyzmetin tehnıkalyq qamtamasyz etý maqsatynda aqparattandyrý salasyndaǵy sarapshylardy tartýǵa, biliktilikti arttyrý kýrstarynan ótýge quqyly.

Budan bólek, BAQ-pen ózara is-qımyl jasaý jónindegi ýákiletti tulǵa medıakeńistikte qoǵamnyń teris pikirine ákeletin aqparat anyqtalǵan jaǵdaıda memlekettik organnyń birinshi basshysyn ýaqytynda habardar etýge mindetti.