«Nur Otan» partıasy jańǵyrý aıasynda elimiz boıynsha 1000 İT-synyp ashyp, onda jylyna 150 myń balany oqytýdy qolǵa aldy. Odan bólek, partıanyń bastamasymen 20 İT-ortalyq ashylyp, jylyna 35 myń qazaqstandyq osy sala boıynsha arnaıy bilim almaq. Bul jóninde «Nur Otan» partıasy Tóraǵasynyń Birinshi orynbasary Máýlen Áshimbaev óziniń FACEBOOK áleýmettik jelisindegi resmı paraqshasynda jarıalady.

Aıta keteıik, búgin Ortalyq komýnıkasıalar qyzmetinde ótken brıfıń barysynda «Nur Otan» partıasynyń jańa jobalary kópshilikke tanystyryldy. İs-sharaǵa Premer-Mınıstrdiń orynbasary Asqar Jumaǵalıev pen «Atameken» Ulttyq kásipkerler palatasynyń Basqarma tóraǵasy Ablaı Myrzahmetov te qatysty. Sebebi, atalǵan partıalyq jobalar Úkimet jáne bıznes qaýymdastyqpen birlesip júzege asyrylmaq.

Atalǵan İT-synyptarda 8-16 jas aralyǵyndaǵy balalar baǵdarlamalaý jáne robot tehnıkasynyń negizderi jaıynda Eýropalyq bilim berý standarty negizinde tereńdetilgen bilim alady. Bul bastama mektepterge fakúltatıvti pán retinde engizilip, úsh aılyq jáne alty aılyq kýrs retinde júrgiziledi.

Al İT-mamandar daıarlaý bastamasy boıynsha elimizde jumys berýshi İT-kompanıalar men iri joǵary oqý oryndarynyń bazasynda 20 İT-ortalyq ashylyp, jylyna 35 myń adam bilim almaq. Osylaısha «Nur Otan» partıasy «Atameken» ulttyq kásipkerler palatasymen birlesip qazaqstandyqtardyń sıfrlyq saýattylyǵyn arttyryp qana qoımaı, olardyń álemdik iri jobalarǵa qatysatyn básekege qabiletti maman bolyp qalyptasýyna jaǵdaı jasamaq.

Shaǵyn jáne orta bıznesti qoldaý maqsatynda «Nur Otan» partıasy kásipkerlerge arnalǵan Biryńǵaı geoaqparattyq onlaın qyzmet usynatyn portal qurýdy josparlap otyr. Onyń basty maqsaty – bıznes salasyndaǵy memlekettik qyzmetterdi elektrondy formatqa kóshirý, damyǵan elderdiń eń úzdik úlgilerin engizý jáne bıznestegi shyǵyndardy azaıtý. Nátıjesinde kásipkerlerdiń elimiz boıynsha komersıalyq maqsattaǵy jer telimderi men aýksıondar týraly tolyq málimet alýyna, bıznes júrgizýdiń biryńǵaı standartyn engizýge jáne elektrondy úkimet jumysyn jandandyrýǵa múmkindik týady.

Sonymen qatar «Nur Otan» partıasy óńirlerde memleket pen bıznestiń áleýmettik saladaǵy yntymaqtastyǵyn odan ári arttyrýǵa arnalǵan birneshe jobany qolǵa alyp otyr. Sol arqyly mektep asqanalarynyń jumysyn jańǵyrtyp, sport alańdaryn qaıta qalpyna keltirý jumystary júrgizilmek. Odan bólek, arnaıy WEB-saıt arqyly bastaýysh synyp oqýshylaryna arnalǵan densaýlyq sabaǵy oqytylady.

«Rýhanı jańǵyrý» baǵdarlamasy boıynsha da partıa birqatar basym baǵyttardy qolǵa aldy. Bul rette aýyldyq jerlerde aǵylshyn tilin úırenýge qolaıly orta qalyptastyrýǵa jáne elimizde eriktiler qozǵalysyn damytýǵa basymdyq berilip otyr. Soǵan baılanysty aǵylshyn tilin erkin meńgergen 500 qazaqstandyq jáne sheteldik jas erikti aýyldyq mektepterge jiberilip, olar arnaıy qurylǵan klýbtarda jergilikti jastarǵa til úıretetin bolady.

Partıanyń bastamasymen otandyq kitaphanalardy zamanaýı bilim ortalyqtary retinde qaıta quryp, olardyń jumysyn jandandyrý isi de qolǵa alynbaq. Sonyń nátıjesinde biryńǵaı onlaın kitaphana júıesi qalyptasyp, elimizdegi barlyq kitap qory elektrondy formatqa kóshiriledi.

– Qazir búkil álem qarqyndy damyp qana qoımaı, jedel ózgeristerge ushyraýda. Sondyqtan biz de búgingi zaman talaptaryna saı beıimdelýimiz kerek. Osy maqsatta «Nur Otan» partıasy naqty jobalardy qolǵa alyp, jumysty bastap ketti. Bul jobalardyń júzege asyrý múmkindikteri jan-jaqty saraptalyp, tıimdi tetikteri aldyn ala muqıat zertteldi. Partıa osyndaı naqty jobalar arqyly Elbasy aıqyndap bergen maqsat-mindetterdi tabysty júzege asyryp, strategıalyq bastamalarǵa belsene qatysatyn bolady, – dedi Máýlen Áshimbaev.

Brıfıń barysynda vıse-premer Asqar Jumaǵalıev pen «Atameken» UKP Basqarma tóraǵasy Ablaı Myrzahmetov te atalǵan jobalardyń mańyzdylyǵyna nazar aýdaryp, olardy júzege asyrý úshin Úkimet jáne bıznes-qaýymdastyq tarapynan qajetti barlyq jaǵdaı jasalatynyn jetkizdi.