Almaty naryǵynda kontrafaktilik taýarlar azaımaı tur. Saýdanyń qyr-syryn biletin pysyqaılar halyq kúndelikti tutynatyn azyq-túlikten bastap, tipti, dári-dármekti de qoldan jasap, tanymal taýar belgisiniń atymen satýda. Máselen, jótelge qarsy «mýkaltın» preparatynyń kóshirmelerin qaladaǵy eki dárihana ashyq saýdalaǵan. Sóıtse, álgi dárilerge kúmándi qospalar qosylǵan eken. Jalǵan ónimdi áshkerelegen Ádilet departamentiniń mamandary  baraholkadaǵy saýda núktesin de súzip shyqty.

Kásipker kelinshek Mereıgúldiń baraholkadaǵy bul núkteni jalǵa alyp, sómke satqanyna 3 jylǵa jýyqtapty. Sórede samsaǵan taýarlar arasynda qyz-kelinshekterdiń joǵary suranysyna ıe bolǵan tanymal brendti sómkeler de bar. Ádilet departamenti ókilderiniń nazaryn aýdarǵany da osy taýarlar. Óıtkeni, mekemege birneshe álemdik brendttiń ókilderi hat jazyp, bul saýda núktesinde tanymal taýar belgisiniń atymen shyǵarylǵan jasandy sómkeler emin-erkin satylyp jatqanyna shaǵymdanǵan. Mamandar kóp kidirmeı, sóredegi taýarlardy tárkileýge kiristi.

«Bazardan ár-ár jerden alyp osylaı satamyz. Endi jalǵyz tek maǵan tekseris kelip jatyr. Ol jaǵyn bilemin. Endi zańdy túrde tekseris bolǵandyqtan men oǵan qarsy shyǵa almaımyn», - dedi kásipker Mereıgúl Jumahan.

Tekserýshiler tanymal taýar belgisiniń atymen jasalǵan 42 sómkeni tárkilep áketti. Buǵan ishteı qynjylǵan kásipker kelinshek bazardaǵy taýarlardyń barlyǵy derlik jalǵan jolmen jasalǵanyn alǵa tartty. Al quzyrly mekeme mamandary tekseristi tek shaǵym túsken oryndarǵa ǵana júrgizetinin jetkizdi. Máselen, ótken jyly Almatyda 3 mıllıon teńge kólemindegi 2 myńnan astam kontrafaktili ónim tárkilenip, kásipkerlerge de aıyppul salynǵan.

«Bul saýda núktesinde jalǵan ónimder satylyp jatqany týraly aqparat bizge menshik quqyǵy ıesinen tústi. Biz birden shaǵymdy Ádilet departamentine joldap, ónimderdi tárkilettik. Kontrafaktilik ónimdi satý eń aldymen kompanıanyń bedeline zıan keltiredi. Óıtkeni, eksklúzıvti taýarlardy alýǵa asyǵatyn turaqty tutynýshylary bar. Sondyqtan kompanıa óz klıentterin qorǵaıdy», - dedi menshik quqyǵy bar kompanıanyń zańgeri Janat Nurmaǵambetov.

Qazir ásirese kólik bólshekterin, brend markaly kıimder men sómkelerdi, turmystyq hımıa jáne azyq-túlik ónimderin qoldan jasaıtyndar kóbeıip ketken. Tipti, dári-dármekti de tanymal taýar belgisiniń atyn jamylyp satý etek jaıǵan. 

«2017 jyly Almaty qalasy boıynsha 2 jeke kásipkerge qatysty osy «mýkaltın» dári-dármek taýar tańbasyn zańsyz paıdalaný boıynsha jospardan tys tekseris júrgizilgen bolatyn. Tekseris barysynda 100-den asa «mýkaltın» dári-dármegi tárkilendi. Birinshi sýbektiden 60-qa jýyq, ekinshi sýbektiden 40-qa jýyq tárkilenip, 158-bap boıynsha ákimshilik is qozǵalyp, olarǵa aıyppul salynǵan bolatyn», - dedi Almaty qalasy Ádilet departamentiniń zıatkerlik menshik quqyqtary bóliminiń mamany Gúlnaz Ońǵarbaeva.

Aıyppuldarǵa qaramastan, naryqtaǵy zańsyz taýarlarǵa tosqaýyl qoıý múmkin bolmaı tur. 2015 jyldan byltyrǵa deıin Almaty qalasynda 43 myń dana kontrafaktilik taýar tárkilenip, satylymnan shyǵarylǵan. Mamandar tutynýshylarǵa ónimdi satyp almas buryn, zattańbasyna muqıat zer salýǵa keńes beredi. Óıtkeni, zańsyz jolmen qoldan jasalǵan taýar densaýlyqqa qaýipti bolýy múmkin.