Astanadaǵy Ulttyq akademıalyq kitaphanada belgili jazýshy, etnograf ǵalym, baspager, Qazaqstan jazýshylar odaǵynyń jáne Qytaı memlekettik jazýshylar qoǵamynyń múshesi Zeınolla Sániktiń 15 tomdyq jáne onyń jary, aqyn, ustaz Shámshabaný Hamzaqyzynyń 2 tomdyq shyǵarmalar jınaǵynyń tusaýkeseri ótti dep habarlaıdy, Qamshy.kz aqparat agenttiginiń tilshisi.
Bul is-shara elorda tórindegi "Kórme" kesheninde osymen úshinshi ret ótkizilip jatqan Eýrazıa halyqaralyq kitap kórme-jármeńkesimen tuspa-tus kelip otyr. Alys-jaqyn sheteldiń 200-ge jýyq baspasy qatysyp jatqan kórmede oqyrman nazaryna tek jańa kitaptar usynylsa, «Zeınolla Sánik atyndaǵy mádenıet qory» uıymdastyrǵan tanystyrylymǵa akademık Seıit Qasqabasov, profesorlar Serik Negımov, Dıhan Qamzabekuly, Tursynhan Zákenuly, Dúken Másimhan, Eltańba avtory Jandarbek Málibekuly, t.b. belgili ǵalymdar, aqyn-jazýshylar men qalamgerdiń jaqyn-jýyq jerlesteri qatysty. Taǵylymy mol týyndylardyń tanystyrylymyn fılologıa ǵylymdarynyń kandıdaty Serikzat Dúısenǵazın júrgizdi.
Aıta ketsek, 15 tomdyqtyń 1-tomyna «Sergeldeń» romany, 2-tomyna «Basbaı» romany, 3-tomyna Basbaı baı týraly zertteýler, 4-tomyna «Qarakereı Qabanbaı» jáne «Han batyr Qabanbaı» tarıhı esseleri, 5-tomyna «Súleımen bı» tarıhı essesi, 6-tomyna «Tuǵyryl han», «Qaıraqbaı», Demejan» tarıhı esseleri, 7-8-tomdarǵa «Qazaq etnografıasy», 9-tomyna áńgime, novela, hıkaıattary, 10-tomyna «İz» bıografıalyq hıkaıaty, 11-12-tomdarǵa maqalalary men referattary, 13-tomyna «Qazaq emshiligi men dárigerligi» eńbegi, 14-tomyna ocherkteri men estelikteri, sondaı-aq, 15-tomyna joljazbalary toptastyrylǵan. Oǵan qosa, «Sóz-ǵumyr» atty jınaq pen «Zeınolla álemi» atty estelikter kitaby bar. Al jazýshynyń jary Shámshabaný Hamzaqyzynyń 2 tomdyq shyǵarmalarynan bólek, «Sóz-keste» atty kitapshasy da jaryq kórgen. Bunyń bári tusaýkeserge jınalǵan kópshilikke tegin taratyldy.
Shara barysynda aldymen ǵalym Seıit Qasqabasov Zeınolla Sániktiń sheteldegi qazaq ádebıeti men tarıhynyń kórnekti ókili retinde ult rýhanıatyna ólsheýsiz úles qosqanyn basa aıtty.
«Taý silemindeı mol mura fólklor, aýyz ádebıeti, jyr-ańyzdar, el áńgimeleri, kórkem proza, etnografıalyq jazbalar, jolsaparlar, pýblısısıkalyq materıaldar, romandar, povestter men kórkem áńgimeler, qysqa aforızmder men naqyl sózder syndy ádebıettiń alýan janrynda qalam terbeýi Zeınolla Sániktiń shyǵarmashylyq qazynasy baı adam bolǵanyn qapysyz kórsetedi. Shyn máninde, ol san qyrly talant ıesi bolatyn. Bir ǵana «Babalar sóziniń» 20 tomy Qytaı qazaqtary fólklorynyń negizinde shyqqanyn aıtsaq, bul qyrýar eńbekti jınaý jolynda Zekeńniń eńbegi ushan-teńiz boldy. Myna naryq zamanynda da qyzdyń jıǵan júgindeı etip, baqandaı 15 tomdyqty shyǵarýdyń ózi ońaı emes», – dedi akademık. Sol sebepti, bul máseleniń oń sheshimin tapqan qalamgerdiń otbasy men balalaryna, olarǵa kómek qolyn sozǵan ózge de azamattarǵa alǵys bildirdi.
Al profesor Serik Negımovtiń aıtýynsha, Zeınolla Sániktiń «Basbaı» romany – erterekte jazylǵanmen, qazirgi aýyl sharýashylyǵynyń alǵa jyljýyna septigin tıgizip, osy sala mamandaryna ájeptáýir jol nusqaıtyn eńbek. Nege deseńiz, zamanynda ataqty baı bolǵan Basbaı atty keıipker kádimgi arqarlardy úı qoılarymen býdandastyryp, ekeýinen myqty tuqym alǵan seleksıoner bolǵan. Sony kórkem shyǵarmaǵa arqaý etken jazýshynyń ónegelik órnegi myǵym.
Eske sala ketsek, Zeınolla Múbárakuly Sánik 1935 jyly Qytaıdyń Tarbaǵataı aımaǵynda dúnıege kelgen. Beıjiń qalasyndaǵy ortalyq jastar ınstıtýtyn támamdap, eńbek jolyn baspagerlikten bastaǵan. Sóıtip, Úrimjidegi jastar baspasynda jaýapty redaktor bolyp 40 jyldaı qyzmet atqarady. Al 1955 jyldan bastap ádebı zertteý jumystaryn jaza bastaǵan. Sol ýaqytta Qytaıda júrgizilgen "mádenı tóńkeristiń" aýyr soqqysyna ushyrap, "halyq jaýy" atanyp, basynan nebir aýyr kúnderdi de ótkergen. Soǵan qaramastan, qalamgerdiń ǵylymı eńbekterinen, roman, povesterinen quralǵan 20-dan astam kitaby jaryq kóripti. Qazaqstanda "Qarakereı Qabanbaı", "Has batyr Qabanbaı", "Tuǵyryl han", "Demejan batyr", "Halyq kúıshisi Qaıraqbaı", "Baspaı" atty kitaptary basylyp shyqty.
Qadirli qalamger 2013 jyldyń 26 qyrkúıeginde ómirden ozdy.
