Bıyl Almatyda zeınetkerlerge arnalǵan arnaıy ortalyq ashylady.
Budan bylaı Almatynyń qamkóńil qarttary qol qýsyryp qury júrmeıdi. Qoǵamnan qalys qalmaı, belsendi ómir súredi. Bıyl shaharda egde jastaǵy adamdarǵa arnalǵan arnaıy ortalyq ashylmaq. Onda aǵa býyn ókilderi bas qosyp, bos ýaqyttaryn tıimdi ótkizedi. Iaǵnı, kóńili qalaǵan ispen aınalysyp, psıhologıalyq kómek alady. Qala bıligi qarıalardy qoldaý maqsatynda «Belsendi ómir súrý» jol kartasyn ázirledi.
Búginde Almaty qalasynda 222 myńnan astam zeınetker turady. Aǵa býyn ókilderine kóńil bólip, qoldaý bildirý úshin qala bıligi arnaıy «Belsendi ómir súrý» jol kartasyn ázirledi. Halyqaralyq tájirıbege súıene daıyndalǵan jobanyń birinshi kezeńine jergilikti qazynadan 150 mıllıon teńge bólinbek. Atalmysh baǵdarlama egde jastaǵy turǵyndardyń belsendiligin arttyryp, olardyń ómir súrýge qushtarlyǵyn oıatpaq.
«Elbasy Nursultan Ábishuly Nazarbaevtyń «Bes ınstıtýsıonaldyq reformasy» sheńberinde Almaty qalasynyń Qoǵamdyq keńesi qurylyp, sodan bergi ýaqytta qala turǵyndary kóterip kele jatqan kezek kúttirmeıtin máselelerdi sheshýde ózderińizben birlesip, tyǵyz jumys atqaryp kelemiz. Endeshe, «Almaty 2020» damý baǵdarlamasynda kórsetilgen damýdyń basym baǵyttaryn birlese iske asyrýda Qoǵamdyq keńestiń orny qashanda bólek bolmaq. Sondyqtan da qarıalarymyzǵa degen qamqorlyǵymyzdy arttyrýǵa, olardyń ómir sapasyn joǵarylata túsýge baǵyttalyp arnaıy ázirlengen «Belsendi uzaq ómir» jol kartasyn eń alǵashqy bolyp búgin ózderińizdiń nazarlaryńyzǵa usynbaqpyz», - dedi Almaty qalasynyń ákimi Baýyrjan Baıbek.
Qarttar úshin bekitilgen baǵdarlama aıasynda osy jazda Almatyda «Belsendi uzaq ómir súrý ortalyǵy» ashylady. Onda kún saıyn qalanyń 200-ge jýyq egde jastaǵy turǵyny bas qosyp, kóńili qalaǵan ispen shuǵyldanady. Iaǵnı, úılerinde qol qýsyryp qur jatpaıdy. Ortalyqqa kelip kitap oqıdy, sport zaldaryna baryp, shahmat, toǵyzqumalaq ta oınaıtyn bolady. Al «boldym, toldym» demeı, izdeniske jany qumar jandar úshin, tipti, aǵylshyn tili men kompúterlik kýrstar jumys isteıdi. Ári, tegin psıhologıalyq jáne medısınalyq keńes beriledi.
«Bıyl bireý ashylsa, kelesi jyly taǵy da ashý qarastyrylǵan. Bunyń negizgi fýnksıasy - sol ortalyqtyń bazasynda mádenı, demalys ornyn uıymdastyrý. Sonymen qatar, olardyń kompúterlik saýattylyǵyn, solarǵa oqytý taǵy basqa jaǵdaılar qarastyrylady. Bul baǵdarlama egde jastaǵy adamdardy ózderiniń usynystary boıynsha ózgere beredi. Iaǵnı, bul jerde bir qatyp qalǵan qaǵıda joq», - dedi Almaty qalasy Jumyspen qamtý jáne áleýmettik baǵdarlamalar basqarmasynyń basshysy Meıirjan Otynshıev.
Uıymdastyrýshylardyń aıtýynsha, qarıalardyń usynys pikiride eskeriledi. Budan bólek, osy jyly qalanyń barlyq aýmaǵynan 40 áleýmettik klýb ashylady. Ol jerlerde de qarttarǵa ár túrli tegin úıirmeler qarastyrylmaq.
«Búginde qalamyzda qarttarǵa erekshe kóńil bólinip, kóp qoldaý kórsetilip keledi. Osy baǵyttaǵy jumystarǵa 2,6 mlrd teńge bólinedi. Jyl saıyn 4 myń zeınetker saýyqtyrý oryndaryna joldamalar alady. Egde jastaǵy adamdar ózderiniń qoǵamǵa qajettiligin sezinip, bizdiń qoldaýymyzdy sezinýi qajet. Olarǵa qarym-qatynas, tildesý qajet. Olar úlken ómirlik tájirıbe men danalyqtyń qaınar kózi. Olardyń jastarǵa bereri kóp», - dedi Almaty qalasynyń ákimi Baýyrjan Baıbek.
Sondaı-aq egde jastaǵy turǵyndar arasynda áleýmettik týrızmdi damytýǵa erekshe nazar aýdarylady. Qarttar úshin qala men taý arasynda týrısik marshrýttar uıymdastyrylmaq. Al qoǵamdyq keńes músheleriniń usynysymen «Ata -Apa.kz» arnaıy ınternet-portaly ashylýy múmkin. Onda qarıalar úshin barlyq paıdaly aqparattardy toptastyrý kózdelgen.
