Almatyda ataqty skrıpkashy Aıman Musaqojaeva konsert ótkizýde.
Almatyda elordanyń 20 jyldyǵy, Elbasynyń bastaýymen qolǵa alynǵan «Rýhanı Jańǵyrý» baǵdarlamasy aıasynda ataqty skrıpkashy Aıman Musaqojaeva konsert ótkizip jatyr. Klasıkalyq keshti tyńdarmandardyń qulaq quryshyn qandyryp júrgen asa daryndy dırıjer Mıhaıl Iýrovskıı súıemeldeıdi. Al «Solıser akademıasy» memlekettik orkestri shetel klasıkasynyń úzdik shyǵarmalaryn tyńdarman nazaryna usynýda. Talantty mýzykanttardyń keshine áriptesim Jadyra Omarjan da barǵan edi. Ol qazir stýdıamen tikeleı baılanysqa shyǵýǵa daıyn tur. Jadyra, elimizdiń júregi -Astana kúnine oraılastyrylǵan keshtiń erekshe óteri haq. Al almatylyqtardyń klasıkalyq mýzykaǵa qyzyǵýshylyǵy qalaı?
Almaty - qashanda elimizdiń rýhanı ordasy, bilim men ǵylym, mádenıet pen sporttyń ortalyǵy. Búgin ásem shahardyń Abaı atyndaǵy memlekettik akademıalyq opera jáne balet teatrynda ataqty skrıpkashy Aıman Musaqojaevanyń keshi ótip jatyr. Osydan birneshe mınýt buryn bastalǵan konsertte klasıkalyq mýzyka maıtalmandarynyń shyǵarmalary oryndalady. Onyń qatarynda, Rıhard Vagner, Sergeı Prokofev jáne Frans Shýberttiń týyndylary bar. Shetel klasıkasynyń úzdik jaýharlaryn myńdaǵan xalyqqa skrıpkanyń áýezdi ánimen elimizdiń xalyq ártisi Aıman Musaqojaeva jetkizedi. Sondaı-aq kıeli saxnanyń tórine tyńdarmandardyń ystyq yqylasyna bólenip júrgen, Qazaqstanǵa alǵash ret at basyn burǵan dırıjer Mıxaıl Iýrovskıı súıemeldeıdi. Al «Solıser akademıasy» úzdik klasıkalyq shyǵarmalaryn tyńdarman nazaryna usynady.
«Jastardyń sımfonıalyq konsertke, klasıkalyq konsertke drama teatrǵa barýyna yqpaldasýymyz kerek. Olardyń rýhanı jaǵynan, álemdik mádenıetke kózqarasyn qalyptastyrý, bul bizdiń úlken maqsatymyz», - dedi Qazaqstan Respýblıkasynyń halyq ártisi Aıman Musaqojaeva.
Aıta keteıin, kóptegen xalyqaralyq konkýrstardyń laýreaty Aıman Musaqojaeva 1992 jyldan beri «Solıser akademıasynyń» kórkemdik jetekshisi bolyp eńbek etip keledi. Al «Rýxanı jańǵyrý» baǵdarlamasy aıasynda ujym Súndet Baıǵojın, Dımash Qudaıbergen syndy jas óner ıelerimen birge elimiz boıynsha týrne ótkizýdi josparlap otyr. Sondaı-aq qazan aıynda AQSH-ta qazaq xalqynyń baı mádenıetin nasıxattaıtyn xalyq jáne klasıkalyq áýenderin oryndamaq.
